Por X.M. Fernández | Verín | 23/06/2021 | Actualizada ás 09:35
A concelleira de Educación, Cultura e Festexos, Emilia Somoza Basalo, comentaba na presentación da recuperación da actividade cultural que "A partir do mes de xullo, os veciños e veciñas de Verín volverán a gozar dunha atractiva programación de lecer cultural, con propostas para todos os públicos. Tras este parón obrigado, a nosa intención é retomar a nosa axenda presencial apostando sempre pola cultura segura adoptando todas as medidas ditadas polas autoridades sanitarias nos eventos".
O sábado 3 de xullo, ás 12:00 horas, o Auditorio Municipal será o escenario dunha homenaxe moi especial organizada pola Biblioteca de Verín. Baixo o nome de “40+1 - Aniversario de Extraños en el escaparate de Jaime Noguerol”, Verín rende homenaxe a esta obra do ilustre verinés, editada por Juan Luís Recio (editorial La Banda de Moebius), e que logo daría paso ao famoso disco de Miguel Ríos. "Le quitaron al futuro su antifaz de cielo", así comeza a obra que ilustra o gran CEESEPE e onde o Noguerol compón a literatura underground dos oitenta madrileños. A presentación do acto correrá a cargo de Antonino Nieto.
Ese mesmo sábado 3 de xullo terá lugar a primeira das proxeccións cinematográficas ao aire libre. O pase será ás 22:30 horas no aparcamento libre da Preguiza, lugar onde se poderá gozar coa comedia do ano, a comedia galega Cuñados.
O sábado 10 de xullo, ás 21:00 horas, a Praza García Barbón será o escenario do concerto “The Show Must Go On” interpretado pola Agrupación Musical da Limia, quen farán un percorrido pola historia da música nacional, latina e internacional: Alaska y Dinarama, Queen, Europe, ABBA… Sen deixar de lado as súas orixes, incluíndo temas populares e tradicionais galegos. Ademais, como parte da actuación, realízase unha performance do conxuro da queimada.
Os e as amantes do cinema terán outra cita o sábado 17 de xullo, tamén ás 22:30 horas. No mesmo escenario comentado, poderase ver a película Las Niñas dirixida por Pilar Palomero. Trátase dun retrato da xeración das mulleres de hoxe, debuxado a través da educación que recibiron a principios dos 90 en España. Este filme recibiu o premio Goya á Mellor Película.
RESERVA PARA ASISTIR AOS EVENTOS
As entradas para as sesións de cinema estarán dispoñibles, por 5 euros, en www.ataquilla.com mentres que as localidades para o concerto e para a homenaxe serán de balde, sendo necesario para este último realizar unha reserva anticipada no propio auditorio.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.