Denuncian a política de "represión e medo" das tendas de Mercadona na Coruña
A CIG mobilízase ante un destes centros para denunciar os "abusos laborais" que, sosteñen, estarían tendo lugar neles.
Por Galicia Confidencial | SANTIAGO DE COMPOSTELA | 24/06/2021 | Actualizada ás 21:30
Nova mobilización da CIG contra a política de “medo e represión” que denuncian en Mercadona. A sección sindical da Confederación concentrouse este pasado mércores ante unha das tendas da cadea na área metropolitana da Coruña para denunciar eses “abusos de poder” que vencellan á compañía, “así como demandar emprego digno e respecto aos dereitos”.
As mobilizacións, en palabras de André Abeledo, delegado da CIG, son unha "resposta á actitude de non respecto á propia humanidade dos traballadores e das traballadoras. Non pode ser que o persoal de Mercadona veña traballar con medo e que se lle falte ao respecto cando está no seu posto. O que pedimos, aínda que pareza mentira en pleno século XXI, é dignidade".
Estas demandas virían dadas polos “abusos laborais” que dende a Confederación veñen denunciando contra a cadea española. "Non pode ser que a xente traballe con medo e baixo presión constante", apuntan dende a formación sindical a respecto dunha problemática que “acaba afectando seriamente á saúde dos traballadores e das traballadores”.
VARIAS TENDAS
En particular, a CIG denuncia que estes supostos abusos estarían a ter lugar con especial virulencia “na tenda de Bentanzos, na da Avda. de Oza da Coruña e na situada no Outlet de Culleredo”, onde decidiron centrar desta volta as mobilizacións. Por iso denuncian que “fronte á imaxe que Mercadona quere vender publicamente de ser unha empresa modelo, a realidade laboral é ben distinta”, e instan a continuar coas mobilizacións para poñer freo ás circunstancias denunciadas.
O delegado Abeledo anima “as compañeiras e compañeiros de Mercadona” a “non quedar caladas e reaxir ante os abusos laborais xa que é a través da mobilización como se conseguen os avances”. Neste senso, o delegado puxo de exemplo que, tras da campaña de protestas da CIG na provincia da Coruña pola sobrecarga de traballo, a empresa fixo un reforzo de persoal de cara ao verán para cubrir as vacacións e “estanse cubrindo tamén as baixas”.
