A Xunta "analiza o impacto" de instalar muíños de vento nas costas galegas

O vicepresidente segundo e conselleiro de Economía, Empresa e Innovación, Francisco Conde, mantivo esta semana unha reunión de traballo co viceconselleiro de Presidencia do Goberno de Canarias, Antonio Olivera, co obxectivo de explorar vías de colaboración no sector aeronáutico.

Tal e como sinalou o Goberno autonómico nun comunicado, Francisco Conde informou ao viceconselleiro canario do Plan Estratéxico do Polo Aeroespacial 2021-2025, unha nova folla de ruta que establece como prioridades para a Comunidade galega, entre outras, o desenvolvemento industrial da rexión ou a creación de emprego "de calidade".

Na devandita reunión tamén se abordou a posibilidade de colaborar no desenvolvemento da eólica mariña de Galicia. Con respecto a este ámbito, a Xunta participou na constitución do Observatorio da eólica mariña, un instrumento deseñado como punto de encontro onde "identificar oportunidades" e "analizar o impacto" que suporía a instalación de parques eólicos mariños nas costas galegas.

Nesta liña, o Goberno galego asegurou que calquera decisión tomada no sector terá que contar co acordo de todas as partes implicadas, xa que a súa "prioridade" é o "respecto" e "compatibilidade" das actividades pesqueiras coa preservación do seu ecosistema.

Plataforma eólica mariña co maior aeroxerador construído pola UTE Navantia-Windar para Windplus S.A | Fonte: Windplus