O tecido empresarial de Ourense está composto nun 95% por microempresas, segundo un estudo
O alcalde, Gonzalo Pérez Jácome, criticou que en Galicia "hai un tremendo abuso" por parte de Santiago de Compostela co "beneplácito da Xunta de Galicia" en canto apoio para a xeración de emprego.
Por E.P. | SANTIAGO DE COMPOSTELA | 22/07/2021 | Actualizada ás 19:49
O 96% do tecido empresarial de Ourense son microempresas, segundo un estudo da Universidade de Vigo en colaboración co Concello.
O estudo socioeconómico, que foi presentado polo alcalde de Ourense, Gonzalo Pérez Jácome, xunto co profesor Andrés Mazaira, do departamento de organización de empresas e mercadotecnia da Universidade de Vigo, busca permitir elaborar estratexias de creación de emprego e apostar por sectores que lle dean valor engadido ao tecido produtivo da cidade das Burgas.
Para iso, o informe analizou todos os indicadores posibles, como a organización social despois da pandemia, a crecente transformación dixital, a importancia do I+D+i e a revolución verde.
O informe non só recompila as cifras da cidade de Ourense, senón que os contrapón co resto da situación de Galicia. Así, o profesor Andrés Mazaira trasladou que os datos "son moi semellantes" en todo o territorio autonómico, fóra de Santiago de Compostela que "sobresae en todos os apartados".
Entre as conclusións ás que chegou o estudo, Ourense "pode presumir" de ter a segunda taxa máis alta de poboación entre os 15 e os 39 anos de Galicia, un dato que celebraron tanto o rexedor municipal como o profesor Mazaira porque aseguran que "garante unha continuidade xeracional".
Con todo, o estudo trasladou que só o 0,5% das empresas locais teñen 50 ou máis traballadores, de maneira que o 96% correspóndese con microempresas. Así mesmo, concluíu que a taxa de autoemprego é do 17%, "unha das máis altas de Galicia só por detrás de Pontevedra e Santiago de Compostela". En canto ao desemprego concéntrase maioritariamente en construción, hostalaría e comercio.
"BAIXO VALOR ENGADIDO"
Mazaira lamentou que a economía ourensá "concéntrase en actividades de baixo valor engadido", o que se traduce en menos ingresos e menores rendas familiares se se comparan con outras cidades de Galicia. Con todo, a maior preocupación do estudo apuntou ao emprego feminino: as mulleres máis novas e "máis preparadas que nunca" son as que máis abandonan a cidade para buscar emprego e non regresan.
Deste xeito, concluíu que hai cinco grandes retos para o impulso da creación de emprego: apoiar a recuperación, facilitar a adquisición de competencias transversais, impulsar a ocupación e actividade feminina, incrementar actividades económicas e ocupacións capaces de xerar valor engadido e fixar liñas de actuación estables do Concello en materia de emprego.
O estudo, que se pode ver completo a través da propia páxina web do Concello de Ourense, está pormenorizado ata o punto de facer análise por cuadrículas de quilómetro cadrado na cidade, permitindo identificar aquelas zonas nas que "é necesario dirixir os esforzos das políticas municipais". Apela ao Servizo de Emprego do Concello como "unha ferramenta vital para deseñar o futuro da cidade".
"TREMENDO ABUSO"
Pola súa banda, o rexedor municipal, Gonzalo Pérez Jácome, subliñou "o ben" feito que está o informe e recalcou a importancia de ter o apoio da Xunta de Galicia e do Goberno central para poder impulsar o emprego na cidade de Ourense.
Ademais, o alcalde criticou que en Galicia "hai un tremendo abuso" por parte de Santiago de Compostela co "beneplácito da Xunta de Galicia".
"Non hai unha cidade no mundo con menos de 100.000 habitantes con tantos servizos como Santiago de Compostela", criticou. "Decidiron os políticos pór todo o diñeiro dos galegos alí, iso significa que eles son ricos e os demais, cada vez máis pobres. Temos que loitar contra iso", resolveu.
