Por Europa Press / Redacción | SANTIAGO DE COMPOSTELA | 23/07/2021 | Actualizada ás 15:53
As seccións sindicais de CCOO en Navantia Fene e Ferrol, con maioría en ambos os comités de empresa, instan a Goberno central e Xunta a "cumprir e materializar con feitos concretos os compromisos de emprego e futuro" o impulso á eólica mariña, que ha de ter, explican, o seu "epicentro" na Ría de Ferrol. Así, instan as administracións a "remar na mesma dirección".
Tras a firma este xoves pasado do acordo marco entre Iberdrola, Navantia e Windar para fabricar e fornecer megaestructuras para parques de eólica mariña no período 2023-2025, o sindicato espera que "máis aló das palabras nos discursos, as administracións públicas cumpran con feitos co naval da nosa ría".
Nese sentido, apunta que desde "hai tempo" defenden que o futuro industrial de Fene pasa por unha aposta "clara" por esta actividade, para o que é necesario que "todas as partes" remen "na mesma dirección porque diso van depender centenares de empregos directos e indirectos", engade, nunha comarca que "padece unha crise industrial severa".
Ademais, as seccións sindicais de Comisións Obreiras nos comités dos dous estaleiros públicos da Ría de Ferrol piden a Feijóo e á ministra de Facenda, María Jesús Montero, que traballen "man a man co Observatorio da Eólica Offshore" e fagan "pedagoxía" na defensa desta tecnoloxía "e da súa compatibilidade con outras actividades no mar, fundamentalmente as pesqueiras".
CARGA DE TRABALLO
Por outra banda, e ante a disparidade de prazos que este xoves deron os portavoces dos Gobernos central e autonómico sobre o inicio das fragatas F-110 para a Armada española, CCOO considera "fundamental afianzar o emprego con carga de traballo na construción naval militar".
Para iso, reclama que se aceleren os trámites para o inicio dos traballos destes buques e, no caso dos investimentos previstos no estaleiro fenés, fixar "prazos concretos".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.