O Concello de Santiago asina convenios de colaboración con catro entidades sociais por máis de 170.000 euros
Sánchez Bugallo destaca o traballo destas entidades que "chegan onde non chega a administración".
Por E.P. | SANTIAGO DE COMPOSTELA | 26/07/2021 | Actualizada ás 18:52
O alcalde de Santiago, Xosé Sánchez Bugallo, asinou convenios de colaboración coas entidades Fundación Monte do Gozo-Proxecto Home (45.000 euros), Albergue Xoán XXIII (60.000 euros), Aspas (6.000 euros) e a Cociña Económica (60.000) por un total de 171.000 euros. Sánchez Bugallo destacou o traballo destas entidades que "chegan onde non chega a administración" e agradeceu a súa implicación.
O convenio coa Fundación Monte do Gozo para 2021 conta cun importe de 45.000 euros que se destinarán a subvencionar programas da entidade, que atende aos colectivos marxinados ou en estado de necesidade e aqueles en situación de exclusión social.
Co centro cultural social Xoán XXIII, o convenio financia o servizo de aloxamento e acollida nocturna e diúrna, para atender ás necesidades básicas en cada caso concreto que presta o albergue.
Con Aspas, a Asociación de Pais de Persoas con Discapacidade Intelectual, ten unha contía de 6.000 euros para o programa de respiro e/ou emerxencia familiar.
Trátase dun servizo de estancias temporais que dá resposta á necesidade de descanso ou emerxencia familiar para mellorar a calidade de vida das familias con membros con discapacidade intelectual.
No que respecta á cociña económica, a contía da subvención destinarase a financiar o programa para garantir as necesidades de manutención básicas a persoas sen recurso e en risco de exclusión social.
