Baltar quere converter o Pazo Provincial no "Gran Hotel Balneario de referencia en toda Europa"

O presidente da Deputación de Ourense, Manuel Baltar, asegurou que o Pazo Provincial converterase no "Gran Hotel Balneario de referencia en toda Europa" no próximo mandato, que comeza no 2023, e co horizonte máximo de 2027.

No patio interior da Deputación, onde se realizaron as captacións termais, o presidente provincial deu a coñecer o informe que certifica que baixo a edificación hai auga mineromedicinal, e con caudal suficiente para pór en marcha a instalación termal.

Explicou que o acuífero termal consta dun caudal de 3 litros por segundo e unha temperatura de 41,6 graos a 172 metros de profundidade cun contido en sales minerais "propio das augas termais de Ourense".

Ademais, manifestou que por cada 100 metros que se profunde a temperatura ascende en 14 graos e subliñou que os resultados destas sondaxes "supoñen o paso definitivo" para a apertura do centro termal.

O seguinte paso será a obtención da declaración de augas mineromedicinais por parte da Administración autonómica, que é a que ten as competencias.

Para iso a Deputación deberá realizar bombeos mensuais durante 12 meses coa finalidade de comprobar a situación das augas.

"Por suposto, vaise conseguir sen ningún problema", aseverou Baltar quen agradeceu o "rigoroso" traballo que "permite concluír" que se poden facer as exploracións termais sen afectar a sustentabilidade do xacemento arqueolóxico das Burgas.

ANTEPROXECTO

Así avanzou que en próximas datas presentarase o anteproxecto das instalacións que incluirán no propio patio interior do actual Pazo Provincial "unha gran piscina termal romana absolutamente innovadora" e terá unha categoría mínima de cinco estrelas.

Neste sentido, trasladou que xa está a manter conversas con xestores hoteleiros especializados no ámbito termal, así como con investidores con cadeas nas principais capitais mundiais, "para facer realidade un gran hotel que se diferenciará dos do resto de Europa porque estará no centro da cidade e a escasa distancia doutro referente termal como As Burgas".

Augurou que "será a faísca" da dinamización para "impulsar Ourense a nivel internacional", unha reflexión que, expuxo, baséase no seu coñecemento, como presidente da Asociación de Cidades Históricas Termais de Europa, do desenvolvemento de cada unha das 51 cidades que forman parte da entidade e "o efecto dinamizador que estas infraestruturas levan".

"Ata agora ninguén escollera unha zona na que situar a gran instalación termal da que puidesen presumir os ourensáns, pero a Deputación de Ourense pon a súa sede a disposición", sentenciou o presidente da provincia de Ourense antes de apostilar que o termalismo "é a nosa bandeira" e solicitar ao Concello que "sexa o compañeiro de viaxe" deste proxecto "que será o referente do termalismo no vello continente".