Por Europa Press / Redacción | SANTIAGO DE COMPOSTELA | 24/08/2021 | Actualizada ás 17:31
O comité clínico de expertos que asesora á Xunta prevé validar, "se procede", o novo sistema de aforamentos da hostalaría na súa reunión do martes da próxima semana, na que tamén se confirmaría a data exacta de implantación.
Así o avanzou este martes o conselleiro de Sanidade, Julio García Comesaña, durante a rolda de prensa celebrada con motivo da reunión deste organismo e na que á súa vez se abordaron diferentes cuestións relacionadas co citado documento.
Comesaña referiuse ao encontro deste luns con representantes do sector da hostalaría, a quen agradeceu o "bo entendemento" e o traslado de propostas sen "ningún desencontro". Unha delas foi a petición de revisión do uso das barras nestes establecementos, precisamente "un dos temas que se comentaron" durante o comité clínico deste martes.
"O compromiso da Xunta foi revisar o uso das barras e hoxe foi un dos temas que se comentaron", sinalou o titular de Sanidade, que se comprometeu a seguir "avanzando" entre as dúas partes para poder contar cun documento que reúna "o maior consenso posible" e con "a máxima relación fluída e cordial".
A reunión do luns co sector foi, precisamente, "a segunda en poucos días", engadiu Comesaña, quen asegurou que seguirán traballando co sector "buscando o interese común" e agregando propostas e recomendacións de face ao novo sistema de aforamentos que se prevé implantar a principios do mes de setembro.
En todo caso, o titular de Sanidade insistiu en "esperar a ese martes" para coñecer en detalle o texto e as datas definitivas de implantación.
SISTEMA POR NIVEIS
O Goberno galego avanzou o luns que este novo sistema está baseado nas medidas que implemente cada local en lugar da incidencia da covid en cada concello, polo que o aforamento dependerá do grao cumprimento de cada hostaleiro.
Ambas as partes traballan para chegar a criterios comúns sobre as medidas a cumprir, como as distancias, o uso dos xeles hidroalcohólicos ou os sistemas de ventilación, como o medidores CO2, para determinar o nivel no poderá situarse cada establecemento dentro do tres previstos -baixo, medio, alto--.
AFORAMENTOS DEPORTE
Doutra banda, Comesaña foi preguntado pola previsión de aforamentos para o arranque da Primeira RFEF este fin de semana, na que haberá encontros entre equipos galegos. A directriz que existe ata agora afecta unicamente ás ligas profesionais, en concreto un 40% de aforamento segundo o Consello Interterritorial e ata o 29 de agosto.
Comesaña trasladou a súa vontade de que estes parámetros sexan "extensibles" por comparación ao resto de categorías, polo que "a liña de traballo" xunto con Saúde Pública é achegar estes aforamentos aos valores da liga profesional.
En todo caso, lembrou, estes parámetros están pendentes de revisión e que poderían cambiar en función da situación epidemiolóxica, pero sempre partindo da idea de contar con "certa homoxeneidade".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.