Por E.P. | SANTIAGO DE COMPOSTELA | 27/08/2021 | Actualizada ás 15:55
Representantes sindicais reclamaron a Correos un "plan concreto" para garantir a viabilidade de iniciativas como o proxecto piloto en Lugo cos carteiros e carteiras rurais para prestar a domicilio servizos como o envío desde casa de paquetes, o pago de tributos ou a entrega de diñeiro en efectivo, así como o dos caixeiros automáticos en concellos do rural con peche de entidades bancarias.
Tras a visita do presidente de Correos, Juan Manuel Serrano, a Galicia, CCOO e UGT convocaron este venres unha comparecencia ante os medios de comunicación para denunciar falta de diálogo cos representantes sindicais e esixir un "plan concreto", con medios materiais e humanos, para a prestación destes servizos.
José Antonio Pensado, responsable de CCOO de Correos en Galicia, manifestou que levan dous anos denunciando que se están adoptando decisións "sen consultar con ninguén". "Sen negociar", dixo tras criticar que a única reunión en Galicia do presidente de Correos fose co delegado do Goberno.
Sobre os servizos e a ampliación dalgúns deles nesta comunidade autónoma aos que aludiu o presidente de Correos, Pensado manifestou que están de acordo en que leven a cabo. "Pero faltan medios e preparación da xente", sentenciou.
DEMANDAN "FEITOS"
Así, expuxo que non se pode "incrementar o traballo dos compañeiros" sen atender, insistiu, estas demandas. "Queremos feitos, que se negocie e que se fale con quen toca e non vender fume", apostilou en referencia ás organizacións sindicais.
En particular, sobre a prestación de servizos de banca no rural por parte dos carteiros rurais, recalcou que non está a funcionar porque "non teñen medios" e engadiu que "falta cobertura na maioría dos sitios", en alusión aos dispositivos necesarios.
Ademais, denunciou que tampouco se puxeron en marcha outras iniciativas como "contratar drones para repartir paquetes en Galicia, que non están e tampouco os vehículos ecolóxicos". "Queremos que haxa un plan e non vender fume, un plan concreto para facer esas cousas". "Non podemos vender e logo recortar en contratación e externalizar servizos", aseverou.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.