Baixa ao 50% a reserva hídrica de Galicia tras perder os encoros outros 50 hectómetros cúbicos
Así, segundo informou o MITECO, a reserva hídrica de Galicia é de 1.842 hectómetros cúbicos, o que supón un 49,6 % da súa capacidade total, que é de 3.714 hectómetros cúbicos.
Por E.P. | SANTIAGO DE COMPOSTELA | 31/08/2021 | Actualizada ás 19:27
A reserva de auga dos encoros de Galicia volveu a caer outra semana máis e, tras a perda doutros 50 hectómetros cúbicos, sitúase lixeiramente por baixo do 50 por cento da súa capacidade, segundo os datos trasladados este mércores polo Ministerio para a Transición Ecolóxica e o Reto Demográfico.
Así, segundo informou o MITECO, a reserva hídrica de Galicia é de 1.842 hectómetros cúbicos, o que supón un 49,6 % da súa capacidade total, que é de 3.714 hectómetros cúbicos.
Os encoros da conca Miño-Sil (a que xestiona o Goberno central) teñen unha reserva hídrica de 1.414 hectómetros cúbicos, o que supón 35 hectómetros cúbicos menos que hai unha semana e sitúase ao 46,7 % da súa capacidade (1,1 punto menos).
Mentres, na conca Galicia-Costa (que depende da Xunta), a cantidade de auga embalsada pasou de 443 a 428 hectómetros cúbicos. Isto significa que estas presas están ao 62,2 % da súa capacidade total.
Precisamente, o descenso da auga embalsada na conca Miño-Sil provocou as críticas do goberno galego ao Executivo central, por autorizar un "baleirado masivo" das presas. De feito, o presidente da Xunta, Alberto Núñez Feijóo, cualificou esa medida de "irresponsable" e advertiu dos riscos ambientais.
