A Deputación de Pontevedra aborda a recuperación ambiental da Xunqueira de Alba

Tamén e o acceso ao Hospital Gran Montecelo.

Por E.P. | SANTIAGO DE COMPOSTELA | 24/09/2021 | Actualizada ás 14:09

Comparte esta noticia

A Deputación de Pontevedra celebrou este venres o pleno ordinario correspondente ao mes de setembro que incluíu algunhas cuestións de importancia para a capital da provincia como a recuperación ambiental da Xunqueira de Alba e o viario de acceso ao Hospital Gran Montecelo.

Na parte resolutiva da orde do día aprobouse, cos votos a favor de PSOE e BNG e a abstención do PP, a cuarta modificación de crédito do presente orzamento.

Segundo explicou o deputado Carlos López Font, esta modificación inclúe catro accións: a recuperación ambiental Xunqueira de Alba coa eliminación das instalacións do Parque de Maquinaria, unha nova edición do Prácticum Depo, accións do coworking do viveiro de empresas de Barro e a mellora da seguridade viaria nas estradas provinciais.

O vicepresidente da Deputación, César Mosquera, polo seu lado, destacou o "compromiso" da administración provincial na recuperación "completa, seria e decidida" dos terreos da Xunqueira de Alba. Unha actuación que alcanza os 3,7 millóns de euros ao incrementarse en 550.000 euros o orzamento inicial. "Estamos especialmente contentos e satisfeitos de que esta administración teña esta sensibilidade", engadiu Mosquera, que expresou o seu desexo de que o resto de administracións implicadas responsan de igual modo.

ACCESO A MONTECELO

Tamén foi aprobado por unanimidade o convenio de colaboración entre a Deputación e o Concello de Pontevedra sobre o novo viario de acceso ao Gran Montecelo. Unha estrada, de 830 metros de lonxitude que rodeará o complexo hospitalario, cun orzamento de 1,4 millóns de euros. Partirá fronte ao pavillón de Príncipe Felipe e concluirá ao carón do actual aparcadoiro ao aire libre do hospital.

Igualmente foi aprobada por unanimidade a adhesión da Deputación de Pontevedra á "Declaración de Bilbao". Así, a administración provincial comprométese a favorecer marcos normativos que permitan o desenvolvemento de novos modelos de mobilidade, que aseguren a sustentabilidade ambiental e o benestar social e incentivar o desenvolvemento socioeconómico baseado na mobilidade sustentable.

Espazo natural de Xunqueira de Alba, en Pontevedra
Espazo natural de Xunqueira de Alba, en Pontevedra | Fonte: arquivo

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta