Galicia e outras seis autonomías rebélanse contra a orde que prohibe cazar lobos en España

Galicia, Asturias, Cantabria, Castela e León, Andalucía, Comunidade de Madrid e Rexión de Murcia anunciaron que presentarán un recurso contencioso administrativo ante a Audiencia Nacional co obxectivo de lograr que se paralice a orde que impide cazar lobos en España que propuxo o Ministerio para a Transición Ecolóxica e o Reto Demográfico (MITECO) e que avalou o Consello de Estado.

A decisión de incluír "todas" as poboacións do lobo ibérico na Listaxe de Especies en Réxime de Protección Especial (LESPRE), que implica a prohibición de cazalo en toda España, provocou o rexeitamento nas mencionadas autonomías. O PP anunciou, tras coñecer esta orde, que as comunidades gobernadas pola súa formación, --Galicia, Castela e León, Andalucía, Comunidade de Madrid e Rexión de Murcia-- presentarán un recurso contencioso en contra desta orde. Ademais sumáronse Asturias e Cantabria.

A orde ministerial entrou en vigor este mércores, unha vez que foi publicada o martes, 21 de setembro, no Boletín Oficial do Estado.

RADICALMENTE EN CONTRA

Segundo expresou o presidente da Xunta de Galicia, Alberto Núñez Feijóo, con esta prohibición o Executivo galego queda "sen cobertura para financiar os ataques do lobo".

Pola súa banda, a Junta de Castela e León tamén afirmou que está "radicalmente en contra" porque prexudica os intereses xerais da Comunidade, pero non só os seus, senón os de Galicia, Asturias ou Cantabria, os de once comunidades, "a maioría", que estaban en contra da inclusión do lobo na Listaxe.

Ademais das CCAA, as organizacións ASAJA, COAG e UPA acusaron ao Goberno central de "condenar a gandaría á súa extición ao blindar ao lobo" e considérana "allea" aos intereses da gandaría e do medio rural".

SEN FERRAMENTAS PARA XESTIONAR A ESPECIE

Segundo o Principado de Asturias, a publicación da orde ministerial provocou "unha situación de inseguridade xurídica" no modelo de xestión desta especie en Asturias, dado que o cambio na cualificación deste cánido afecta ao II Plan de Xestión do Lobo, actualmente en vigor.

Na mesma liña, o secretario xeral do PSOE en Cantabria e vicepresidente do Executivo autonómico, Pablo Zuloaga, ve necesario recorrer a decisión do Goberno central sobre a protección do lobo porque as comunidades "quedan sen ferramentas" para xestionar a especie.

Así mesmo, a conselleira de Desenvolvemento Económico, Sustentabilidade e Medio Ambiente de Euskadi, Arantxa Tapia, reclamou un plan de xestión do lobo que permita "casar" os intereses dos gandeiros coa protección desta especie. "O que non pode ser é que se establezan unhas medidas de protección do lobo desde un despacho, afastado da vida rural", advertiu a conselleira vasca.