Inspección inicia un expediente sancionador ao Concello da Coruña por non ter plan de igualdade
O consistorio afirma que a pandemia pospuxo a súa elaboración e que se traballa xa nun.
Por Europa Press / Redacción | A Coruña | 13/10/2021 | Actualizada ás 17:40
Inspección de Traballo iniciou un expediente sancionador pola comisión dunha infracción laboral grave ao Concello da Coruña pola ausencia dun plan de igualdade, segundo informa a CIG.
Este sindicato puxo en coñecemento da Inspección a ausencia do citado plan de igualdade entre homes e mulleres, "así como a falta de accións orientadas á consecución das medidas definidas polo plan anterior". Fíxoo, sinala, ao non apreciar "ningunha vontade por parte do goberno local de iniciar medidas de negociación e elaboración dun novo plan de igualdade".
Agora, tras informar da medida adoptada pola Inspección de Traballo, instan á alcaldesa, Inés Rei, a mostrar "non xa unha conciencia feminista, tal e como promulgou no seu discurso de investidura, senón un compromiso claro e firme no cumprimento da legalidade vixente en materia de igualdade e en materia laboral".
RESPOSTA DO CONCELLO
Pola súa banda, desde o goberno local precisaron que a Xunta de Persoal deu traslado o pasado 28 de setembro do seu interese en pór en marcha un novo plan de igualdade que substitúa o anterior, en vigor entre 2017 e 2019.
Así mesmo, afirma que respondeu a devandita petición o pasado día 8 "mostrando a súa máxima disposición a acordar e implantar un novo plan que teña vixencia ata o final do mandato".
Ademais, sostén que se trasladou que as circunstancias derivadas da pandemia "obrigaron a pospor a elaboración dun documeno no que se está traballando" e reitera a súa disposición a manter "os encontros que sexan necesarios para contar cun novo plan canto antes".
