A Xunta sobre o uso deturpado do topónimo A Toxa no foro La Toja: "É unha decisión comercial"

A Consellería de Cultura enviou unha carta aos organizadores do evento lembrando que a denomiación oficial da illa é A Toxa e non A Toja.

Por Europa Press / Redacción | SANTIAGO DE COMPOSTELA | 22/10/2021 | Actualizada ás 13:19

Comparte esta noticia

A Xunta encadrou nunha decisión "comercial" dos organizadores do Foro A Toja que empregasen o topónimo deturpado da illa da Toxa, no Grove, para bautizar o evento que a finais de setembro reuniu a distintas personalidades da política e a economía, incluídos o rei Felipe VI e o presidente do Goberno, Pedro Sánchez.

Cuestionado durante a Comisión 4ª do Parlamento galego celebrada este venres pola deputada do BNG Montse Pardo, o secretario xeral de Política Lingüística, Valentín García, asegurou que a Consellería de Cultura, Educación e Universidade enviou unha carta aos organizadores do foro, promovido polo grupo hoteleiro Hotusa, para "lembrarlles" que o topónimo oficial da illa arousá é A Toxa e non A Toja como figura na denominación do evento.

"Gustaríanos que tivese outro nome, e así llo trasladamos", apuntou García, que incidiu en que o nome do foro é "unha marca comercial" elixida pola empresa promotora, "que decidiu chamarlle así como puido chamarlle 'Mar dentro' ou 'Confín dous verdes castros'".

Así as cousas, o responsable de Política Lingüística desligou á Administración autonómica da organzización do evento e, por tanto, do uso do topónimo deturpado. Nesta liña, incidiu en que "o apoio" da Xunta ao evento limítase á "presenza" do seu presidente, Alberto Núñez Feijóo, e doutros membros do goberno.

Nesta liña, Valentín García engadiu que o emprego de topónimos deturpados tamén existe noutros ámbitos, como en entidades deportivas "algunha da máxima relevancia", ademais de permanecer entre a sociedade á hora de referirse a lugares, como, por exemplo, ocorre na cidade de Santiago "ao falar da Porta Fajera ou de Conjo".

Cuestionado polo grupo nacionalista sobre a declaración como fundación de interese galego a entidade que organiza o foro, o responsable do Executivo autonómico resaltou que o uso dun topónimo deturpado non é motivo para "negar" a súa inscrición no rexistro de fundacións autonómico.

Arquivo - Fotografa de familia durante o acto de clausura do II Foro A Toja-Vínculo Atlántico celebrado na Illa de Toja, Pontevedra, Galicia, (España), a 3 de setembro de 2020.. Beatriz Ciscar - Europa Press - Arquivo
Arquivo - Fotografa de familia durante o acto de clausura do II Foro A Toja-Vínculo Atlántico celebrado na Illa de Toja, Pontevedra, Galicia, (España), a 3 de setembro de 2020.. Beatriz Ciscar - Europa Press - Arquivo | Fonte: Europa Press

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta