Empresarios galegos procuran posibilidades de investimento en Uruguai en alimentación, naval ou loxística

A embaixadora de Uruguai en España, Ana Teresa Ayala Barrios, mantivo un encontro na Confederación de Empresarios de Galicia (CEG) no que expuxo a empresarios galegos diferentes posibilidades de investimento no país suramericano. Esta xornada, celebrada en Santiago de Compostela este luns, tamén contou coa intervención do cónsul xeral do país en Galicia, Asturias, Cantabria e País Vasco, Ramiro Rodríguez Bausero.

Así, Rodríguez Bausero remarcou que aínda queda posibilidade de expansión en sectores que xa están instalados en Uruguai e de avanzar en novas áreas nas que Galicia pode achegar, como "o sector agroalimentario, o naval, o loxístico e portuario, o pesqueiro e conserveiro, o téxtil, o forestal e, por que non, a banca".

Pola súa banda, a embaixadora subliñou que "Uruguai destaca por ser un país serio, confiable e estable política e socialmente; cunha localización estratéxica; cun alto desenvolvemento do goberno electrónico con respecto aos países da súa contorna; e cun exitoso ritmo de vacinación tras a pandemia, cifrado en 76% da poboación coa pauta completa recibida".

"Concretamente no que respecta á relación económica bilateral, e segundo datos do Banco Comercial de Uruguai, España é o noso principal socio investidor", expón Ayala Barrios. "De acordo ao ICEX, o noso país ocupa unha posición extraordinariamente elevada para o tamaño da súa economía, sitúase no posto 15º do ranking de destino, cun valor de 6.929 millóns de euros", continuou.

Por último, a embaixadora de Uruguai en España puntualizou algúns dos sectores onde o investimento español é máis destacado, como son as enerxías renovables e infraestruturas, incluíndo ferroviarias, estradas e portuarias; telecomunicacións, turismo, banca e servizos financeiros.

O presidente da CEG, Juan Manuel Vieites, destacou durante a súa intervención que "España é o sexto socio económico de Uruguai no que a importacións se refire". Así mesmo, "Galicia, en 2020, foi a terceira comunidade autónoma con maior saldo comercial con este país, unicamente por detrás de Madrid e Cataluña, o cal dá proba da importancia das relacións da comunidade e o país suramericano".