A intermodal de Santiago contará cun centro comercial enriba das vías do tren

Adif adxudicou as obras para a construción do edificio de viaxeiros da estación intermodal de Santiago, unha actuación que ten 30,06 millóns de euros de orzamento e que levarán a cabo as construtoras Copasa e Obras Taboada Ramos. A construción do recinto, que dará unidade ás estacións de tren e autobuses actualmente conectadas por unha pasarela, tamén contempla a execución das obras de termínaa ferroviaria para a súa adaptación á rede de alta velocidade, como así establece no convenio subscrito entre o Goberno central, Xunta e Concello de Santiago no ano 2016.

O novo edificio de viaxeiros elevarase por encima das vías e estará conectado, ademais de con as estacións de tren e autobús, coa rede urbana e albergará un espazo para a explotación comercial, Segundo explica nun comunicado a operadora ferroviaria, o edificio "formará unha unidade volumétrica coa pasarela peonil sobre vías xa en servizo" polo que, dando unidade ás estacións, creará "unha contorna de intermodalidade para a cidade de Santiago".

Así as cousas, a actuación contempla o acondicionamento das plataformas existentes para "permitir a execución dun sistema de conexións verticais que una o vestíbulo principal, situado a un nivel superior, coa zona de uso ferroviario". Ademais, o contrato adxudicado tamén recolle outras actuacións como a reestruturación da superficie de aparcadoiro e a urbanización completa do ámbito interior da estación.

Por último, Adif incide en que as obras "respectarán e complementarán" as actuacións finalizadas na estación de Santiago en 2018, que consistiron na remodelación de vías e instalacións ferroviarias, plataformas, marquesiñas onda ampliación do edificio de viaxeiros existente, entre outras cuestións que supuxeron un investimento global de 9,25 millóns.