Por E.P. | SANTIAGO DE COMPOSTELA | 25/11/2021 | Actualizada ás 21:04
O Parlamento de Galicia insta á Xunta a esixir ao Goberno central a modificación da normativa sectorial en materia de costas "que permita a protección e posta en valor" das construcións tradicionais preexistentes á lei de costas.
O texto, que partiu do PP e defendeu a deputada Marisol Díaz na comisión de ordenación territorial, destaca que son "elementos que contribuíron notoriamente a conformar a paisaxe característica do litoral galego".
Marisol Díaz concretou que a Xunta ten identificados 361 inmobles de valor ambiental, patrimonial e arquitectónico en servidume de protección do dominio público marítimo-terrestre.
Pola súa banda, o parlamentario do BNG Luís Bará deu a "benvida" aos populares nesta defensa, e subliñou a postura do seu grupo a favor de "pór de relevo a relación de Galicia co mar".
Na súa quenda, a socialista Patricia Otero viu "bastante forte a palabra esixir" posto que "non é ter suficiente talante" e vinculouna co "autoritarismo ao que nos ten adoitado o PPdeG". Con todo, apoiou esta iniciativa, sen deixar de sinalar que é unha "pena que non se desen conta xa en 2014" desta necesidade.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.