Morren uns 150 estorniños dunha bandada en pleno voo e precipítanse sobre unha rúa de Ferrol

Unha bandada duns 150 estorniños faleceron sobre as 9,00 horas deste venres en pleno voo e precipitáronse sobre a rúa Alcalde Quintanilla Martínez, no barrio de Caranza, en Ferrol. As aves caeron contra vehículos e mesmo algún viandante que pasaba polas proximidades do Hospital Ribeira Juan Cardano.

Os veciños avisaron de inmediato á Policía Local de Ferrol, que se desprazou cunha patrulla, ademais dun técnico ambiental da Xunta e técnicos da empresa que realiza o servizo de control de aves para a Concellaría de Medio Ambiente de Ferrol, que foron os encargados de retirar os exemplares de estorniños pintos ('Sturnus vulgaris') mortos da vía pública.

Tamén se localizaron outros cinco exemplares vivos, pero que eran incapaces de retomar o voo, polo que foron trasladados en transportines ao Centro de Recuperación de Fauna Salvaxe, situado en Oleiros, dependente da Xunta.

Desde o primeiro momento, tanto o Concello de Ferrol como a Xunta estiveron en contacto e en colaboración para tratar de pescudar as causas da morte dos paxaros.

Segundo apuntaron por parte da administración local, a empresa de control de aves de Ferrol localizara o pasado xoves, día 25, unha pequena bandada de estorniños, uns 30 exemplares, na zona da Universidade, aínda que nos demais durmideiros catalogados na cidade non se detectou presenza destas aves.

A zona onde apareceron estes exemplares mortos e feridos "non é un durnideiro catalogado previamente e antes non se recibiu ningún aviso da presenza de estorniños".

Fontes consultadas por Europa Press detallaron que a electrocución dunha bandada de paxaros adoita suceder cando voan moi preto uns doutros.

Desta maneira, se un paxaro toca cunha á un cable de alta tensión pódese producir o fenómeno de arco eléctrico e este transmítese rapidamente ao resto da bandada, co que a descarga pode ser mortal para o grupo.