Por E.P. | SANTIAGO DE COMPOSTELA | 28/11/2021 | Actualizada ás 19:16
A Academia Galega de Seguridade Pública (Agasp) da Estrada acolleu este domingo o acto de entrega das Medallas ao Mérito de Protección Civil, onde un centenar de membros recibiron estas condecoracións correspondentes ás edicións de 2020 e 2021, xa que o ano pasado suspendeuse pola pandemia.
Neste evento participou presencialmente o vicepresidente primeiro da Xunta, Alfonso Rueda, mentres que o presidente, Alberto Núñez Feijóo, interveu a través dun vídeo. Ambos destacaron o labor dos voluntarios destas agrupacións durante a crise da covid-19. Neste sentido, o titular do Goberno galego puxo o foco na "intensa actividade" que mantiveron estas unidades tanto durante a fase máis dura da pandemia como nos dispositivos de vacinación.
"Estivestes, como sempre, á altura. Demostrastes que sodes un alicerce dos servizos de emerxencias", recalcou Feijóo no vídeo, para seguidamente garantir o "total apoio e compromiso" da Xunta con estes corpos. Pola súa banda, o vicepresidente subliñou o traballo "altruísta" que desenvolven estes efectivos no seu día a día non só pola seguridade da veciñanza durante a crise sanitaria, senón tamén polo seu acompañamento e a entrega de alimentos e medicamentos.
Por isto mesmo, o conxunto das agrupacións de voluntarios de Protección Civil de Galicia recibiron a medalla de ouro destas condecoracións do ano 2021 pola súa colaboración na emerxencia sanitaria. Xunto a elas, outras decenas de persoa subiron para recoller o resto de recoñecementos en tres niveis --ouro, prata e bronce--.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.