600 euros ao mes só en produtos básicos nunha familia de catro membros
A inflación anima ao consumidor galego a adiantar e planificar máis as compras do Nadal. Produtos estrela desta época, como os do mar, rexistran alzas maiores ás doutros anos.
Por Europa Press / Redacción | SANTIAGO DE COMPOSTELA | 06/12/2021 | Actualizada ás 13:38
Coa inflación disparada ao 5,7% en outubro en Galicia e a previsión de que así seguirá o que resta de ano, os consumidores galegos adiantan as súas compras do Nadal, o que elevou máis aínda os prezos dalgúns produtos 'estrela' como os procedentes do mar.
"Este ano, moitas familias non poderán dispor de produtos habituais do Nadal porque o peto o vai a impedir. O aumento de prezos é importante, sobre todo en produtos como os do mar", advirte o portavoz da Unión de Consumidores de Galicia, Miguel López, en declaracións a Europa Press.
Pola súa banda, o presidente de Facua na comunidade galega, Víctor Muñoz, constata que a necesidade de planificar e anticipar compras é este ano máis acusada que en anteriores ocasións.
Ambos destacan que o aconsellable é realizar unha lista do que un desexa adquirir para evitar as compras compulsivas, pero a elevada demanda, advirten, está a contribuír a incrementar máis (e antes) uns prezos xa "importantes" debido ao encarecemento dos custos de produción, fundamentalmente pola enerxía. "Todo se está repercutindo aos de sempre, ao consumidor, ao que os salarios non lle aumentan nin moito menos na mesma medida", lamenta Miguel López.
Precisamente a este respecto, diferentes expertos como representantes do Consello Galego de Economistas ou do centro de estudos de BBVA constatan do risco de que haxa "conflitividade laboral" pola reivindicación de adecuación dos soldos á inflación nos próximos meses.
Estes dous organismos avisan, así mesmo, sobre o risco de que a alza dos prezos se prolongue e chegue unha segunda onda de inflación, despois da provocada polo acontecido hai un ano que houbo aforro e menos consumo. En todo caso, valoran que, no caso español pero sobre todo no galego, é o consumo o que está a manter o dinamismo para a recuperación da economía.
Por parte de Facua, Víctor Muñoz lanza unha mensaxe ás autoridades para que asuman tarefas de inspección pois debe existir un "control administrativo" dos prezos. "Teñen que vixiar que as empresas non se estean aproveitando destas circunstancias", resalta.
MENOS GASTOS EXTRA
O Instituto Galego de Consumo desenvolve campañas informativas relacionadas, por exemplo, coa factura da luz e atende queixas por cuestións relativas a fallos de subministración ou repotenciacións. No entanto, no relativo ao índice de prezos de consumo (IPC) é o Instituto Galego de Estatística (IGE) o que leva en Galicia a análise dos datos.
Mentres, a Unión de Consumidores de Galicia, que analiza os datos cun observatorio propio, dá conta do impacto na cesta da compra da subida de prezos en xeral e das materias primas e os custos de produción en concreto. Unha familia galega con catro membros, calcula, está a gastar "só en produtos básicos" como carne, peixe, lácteos e algún envasado, uns 600 euros ao mes. "Isto fai que o escenario sexa complicado", sinala Miguel López.
Ante isto, indica que a reacción do cidadán é a "esperada e sempre recomendable planificación das compras" e tamén un "uso máis responsable dos alimentos", para evitar o desperdicio.
