Por Galicia Confidencial | Compostela | 28/03/2014 | Actualizada ás 16:00
Será das poucas formacións galega que concurra en solitario ás eleccións europeas. E, por iso, o Partido da Terra (PT), acaba de abrir a todos os cidadáns un proceso para que "todo o mundo que queira participar" como candidato.
O Partido da Terra foi fundado en xullo de 2011 como unha plataforma "para provocar unha transformación radical e necesaria do concepto política, a través da reivindicación da democracia directa assemblear". Superando a definición tradicional de "partido", o PT concorrerá nas próximas eleccións europeas como "plataforma libre de demandantes comarcais", motivo polo cal inicia un proceso aberto para conformar unha Candidatura da Terra, no que calquera persoa poderá optar a integrarse nela ou participar na súa definición.
No seu "Proceso Aberto", destacan que os 54 postos da candidatura e as até 10 prazas de suplentes deben ser atribuídos "consecuentemente" a unha comarca ou comunidade no exterior. As persoas a ocupar cada un dos lugares da candidatura serán escollidos en asemblea aberta na que poderán participar todas as persoas inscritas para ese efecto. Posteriormente, a persoa electa fica vinculada so mandato imperativo ás decisións da asemblea que a designou.
O prazo para a presentación formal da candidatura completa ante a Xunta Electoral iníciase o 16 de abril de 2014 finalizando o día 21. Por iso, no cadro deste Proceso Aberto, establecese como prazo límite para a presentación de candidaturas á listaxe da Candidatura da Terra o día 6 de abril e como prazo límite para a inscrición nas asembleas abertas que irán escoller cada integrante da candidatura comunitaria o día 8 de abril. As asembleas deben celebrarse entre os días 9 e 13 de abril.
Para presentarse a candidatura a unha posición na Candidatura da Terra ao Parlamento Europeo, a persoa interesada non precisa ser membro da Mancomunidade do PT, deberá dar conta do: nome completo, correo, teléfono, enderezo e copia do documento de identidade a info@partidodaterra.net. Deberá encamiñar tamén unha breve síntese biográfica e unha breve exposición de motivos para concorrer --"un quen ves sendo"--. Estes datos serán públicos na páxina web específica das eleccións primarias.
Información completa: http://www.partidodaterra.net/candidatura-da-terra/
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.