As familias con fillos con enfermidades graves manterán as axudas ata que cumpran 23 anos, tras aprobarse o PGE

Os Orzamentos Xerais do Estado (PGE) para 2022, aprobados definitivamente polo Congreso este martes 28 de decembro, contemplan estender as axudas a familias con fillos con enfermidades graves ata que cumpran 23 anos e non ata os 18, como ocorre actualmente. A medida, por tanto será de aplicación, a partir do próximo sábado 1 de xaneiro de 2022.

Así o recolle unha emenda transaccional pactada durante o trámite parlamentario do texto no Congreso o pasado mes de novembro e que foi aprobada co voto de todos os grupos.

O subsidio, contemplado na Lei Xeral da Seguridade Social, beneficia a unhas 8.000 familias en todo o Estado e ten por obxecto compensar a perda de ingresos que sofren os pais e nais ao ter que reducir a súa xornada, coa consecuente diminución do seu salario, pola necesidade de coidar de maneira directa, continua e permanente aos seus fillos.

Ata agora, esta prestación finalizaba cando a persoa menor cumprise os 18 anos pero agora esta prestación ampliarase ata os 23 anos. As familias que viñan reivindicando esta extensión das axudas valoraron no seu día este avance pero considérano insuficiente. Así o expresou Isabel González, nai dunha moza con Atrofia Muscular Espinal (AME) e un 100% de discapacidade, que lanzou unha petición na plataforma Change.org en 2019 coa que xa conseguiu máis de 100.000 firmas.

No caso de Isabel, ela reduciuse a xornada ao cento por cento para coidar da súa nena. Aínda que, o pasado 15 de xullo, a súa filla cumpriu 18 anos e a lei deixou de amparala. "Tívenme que incorporar a traballar co que leva, teño que pagar a un coidador pero o coidador non a coida igual que eu, polo que me collín unha baixa laboral pero vou estar toda a vida de baixa cando podo ter unha lei que me ampare?", sinalaba Isabel en declaracións a Europa Press, nunha entrevista o pasado 1 de novembro.

Afectado por neuropatía, unha enfermidade rara | Fonte: neuromuscularbcn.org