O PP acusa a Pedro Sánchez de "castigar" a Galicia e esíxelle estender as desgravacións fiscais polo Ano Santo
Por E.P. | Santiago de Compostela | 03/01/2022 | Actualizada ás 14:30
O PPdeG acusa o Goberno de Pedro Sánchez de estar "a discriminar" e "castigando" a Galicia por non estender as desgravacións fiscais polo Ano Santo Xacobeo 2022, algo que lle esixe aprobar.
Así o expuxo a viceportavoz do Grupo popular no Parlamento galego, Paula Prado, quen, sobre as desgravacións fiscais vinculadas ao Xacobeo, lamentou que "non votaron a favor" dunha emenda neste sentido na tramitación dos orzamentos xerais do estado para 2022 nin o PSOE nin os seus "socios de Goberno".
Para o PP galego, o Ano Santo ampliado a este 2022 "debe ser un motor de recuperación para que Galicia aproveite para achegar riqueza a todo o territorio".
Por iso, censurou que o apoio que si reivindica do Executivo da Xunta non estea "acompañado" do "compromiso firme por parte do Goberno central", debido á "escaseza" de investimentos e a "non extensión das desgravacións fiscais".
Neste sentido, reclama ao Goberno central "que atenda a vontade manifestada polo Parlamento e o Congreso e amplíe o programa de apoio ao Xacobeo" ata decembro de 2023, xa que ve "totalmente incomprensible" que faga "oídos xordos".
