Alertan da "grave contaminación" de augas na contorna da mina de Penouta, en Viana do Bolo
Ecoloxistas en Acción asegura que a contaminación con metais pesados é "persistente".
Por Europa Press / Redacción | Ourense | 03/01/2022 | Actualizada ás 20:20
A organización Ecoloxistas en Acción denunciou a existencia dunha "grave contaminación" de augas na contorna da mina da Penouta, situada no concello ourensán de Viana do Bolo.
O colectivo afirma que esta situación foi denunciada ante a Confederación Hidrográfica Miño-Sil, encargada da xestión da conca.
Ecoloxistas aseguran que a contaminación con metais pesados é "persistente" nas masas de auga próximas á explotación mineira, onde "se superan en varias ordes de magnitudes os valores máximos permitidos de arsénico, mercurio, cadmio e chumbo".
A plataforma asegura que esta situación figura en informes "en poder das administracións" e reclama á CHMS que determine o alcance da contaminación.
