As persoas inmunodeprimidas recibirán unha cuarta dose da vacina contra a Covid

A Comisión de Saúde Pública, na que están representandas as comunidades autónomas e o Ministerio de Sanidade, acordou este xoves que as persoas inmunodeprimidas reciban unha cuarta dose da vacina contra a COVID-19 aos cinco meses da última dose.

"As persoas que recibiron dose adicional de vacina ARNm por estar incluídas no Grupo 7 ou ser persoas que reciben tratamento con fármacos inmunosupresores recibirán unha dose de recordo aos 5 meses da última dose", explicou o Ministerio de Sanidade.

Neste grupo atópanse, entre outros, persoas de moi alto risco, como aquelas con fibrosis quística, transplante de proxenitores hematopoxéticos, transplante de órgano sólido e en lista de espera para transplante de órgano sólido, transplante pulmonar, renal, pancreático, cardíaco, hepático ou intestinal.

Tamén enfermos de diáleses de diversos graos, enfermidades oncohematolóxicas e diversos tipos de enfermos de cancro con ou sen quimioterapia, así como diversos casos de VIH, inmunodeficiencias ou síndromes de Down maiores de 40 anos.

DOSE DE REFORZO PARA TODAS AS PERSOAS MAIORES DE 18

Este xoves, a Comisión tamén autorizou as doses de reforzo da vacina contra a COVID-19 a todas as persoas maiores de 18 anos. Así, segundo anunciou en rolda de prensa este xoves a ministra de Sanidade, Carolina Darias, amplíase o rango de idade da vacinación con dose de reforzo en España, que se situaba polo momento ata os 40 anos.

A ministra detallou que, como na primeira etapa da vacinación, irase "de maneira ordenada" por grupos de idade de maior a menor, "de dez en dez". Desta forma, unha vez se remate cos adultos maiores de 40 anos, empezarase cos de 30 e así sucesivamente ata chegar aos de 18. En calquera caso, priorizarase ás persoas de risco e ás que completaron hai máis tempo a pauta de vacinación.

Nestes momentos, apenas o 25,15 por cento dos cidadáns españois de 40 a 49 anos recibiu a dose de reforzo, en comparación co 47,87 por cento dos de 50 a 59 anos, o 82,50 por cento dos de 60 a 69 e o 89,55 por cento dos maiores de 70 anos.

Por outra banda, a Comisión tamén aprobou a redución do intervalo entre a pauta completa e a dose de reforzo de seis a cinco meses, "en consonancia co que están a facer outros países da nosa contorna", segundo resaltou Darias. "Tamén en función da evidencia que imos tendo, xa que a partir do cinco ou seis meses empeza a baixar a protección dos anticorpos", engadiu.

Igualmente, a Comisión tamén fixo un chamamento á necesidade de "seguir priorizando a vacinación dos menores de 12 anos". A datos de onte, un total de 1.240.009 nenos de 5 a 11 anos xa recibiron a súa primeira dose, o 37 por cento do total, o que supón 48.297 máis que o martes (1.191.712), tras o inicio da vacinación o mércores 15 de decembro.

DATOS DE GALICIA

O anuncio chega nun momento en que o proceso de vacinación contra a Covid-19 en Galicia continúa con outros 9.652 menores de cinco a 11 anos coa dose pediátrica recibida este pasado mércores, que supoñen un 80,95 por cento dos convocados Segundo os datos facilitados este xoves a Europa Press pola Consellería de Sanidade este pasado mércores recibiron a dose pediátrica 9.652 menores dos 11.922 citados, o que supón un 80,95 por cento, mentres que o martes pasado fixérono 10.133 de 12.040 convocados (un 84,16%).

Os datos publicados pola Consellería de Sanidade no 'Cronómetro da Vacinación' este xoves, con datos da xornada de vacinación deste mércores, recollidos por Europa Press, reflicten que se administraron ata a data 6.069.676 doses contra a Covid-19 en Galicia, despois de ser inoculadas 25.413 este pasado mércores. Desas 25.413 doses, 1.228 foron para completar pautas, polo que aumentan a 2.367.983 as persoas inmunizadas, que supoñen o 87,7 por cento do conxunto da poboación galega.

Por grupos de poboación, por vulnerabilidade, hai 17.529 cidadáns de alto risco coa pauta completa; 16.321 dependentes non institucionalizados e 27.604 institucionalizados. Pola súa banda, 2.187.746 terminaron o proceso chamados pola súa idade. Por probabilidade de exposición, 74.168 profesionais do ámbito sanitario teñen pauta completa, 27.458 do sociosanitario e 16.466 traballadores de actividades consideradas esenciais tamén a recibiron.