A patronal galega alerta de fuga de empresas a Portugal se se sube máis o salario mínimo
Cre que "non é o momento" de subilo porque "a recuperación non está consolidada".
Por Europa Press / Redacción | SANTIAGO DE COMPOSTELA | 27/01/2022 | Actualizada ás 14:28
O presidente da Confederación de Empresarios de Galicia (CEG), Juan Manuel Vieites, sostivo que "non é o momento" de subir o salario mínimo interprofesional (SMI) ao considerar que "a recuperación non está consolidada".
"Desde a CEG non nos opomos a dialogar e a buscar de cara ao 2023 ou 2024 posibles modificacións, pero non no momento actual porque aínda non está consolidada esta recuperación", sostivo este xoves en declaracións aos medios tras participar nun acto organizado por Iberdrola en Santiago de Compostela.
Na súa intervención, sostivo que este asunto debe "debaterse" no marco do diálogo social se a recuperación se mantivese. "Se isto se mantivese si que poderiamos abordar o que é o salario mínimo interprofesional", incidiu para pedir que non se esqueza que "desde o ano 2019 se ha incrementando un 29,3%".
Ademais, avogou por mirar o que "pasa ao redor". "Estamos na Unión Europea, hai países nos que o SMI está un 19,7% por baixo", dixo en referencia a Portugal. "Non hai que buscar que as nosas empresas se vaian para esas zonas", advertiu.
FONDOS EUROPEOS
O presidente da Confederación de Empresarios de Galicia (CEG), Juan Manuel Vieites, considerou necesario que Galicia "non saia prexudicada" dentro da repartición nacional dos fondos europeos de recuperación. "Creo que algunhas cuestións que se produciron, por exemplo no PERTE do automóbil, con declaracións cara a unhas rexións en contra doutras e non falando cos propios empresarios... non é nada loable de cara ao futuro", sostivo ao ser preguntado nun acto en Santiago pola repartición de fondos europeos por parte do Goberno.
Tras iso, incidiu en que o Goberno de España "ten que saber" que hai comunidades autónomas "que se están xogando moito" en sectores como o do automóbil, o mar-industria, a eólica ou as enerxías renovables. Por iso, pediu unha aposta cos fondos europeos cara ás rexións "de forma equilibrada". "Eu non pido preferencias, pero si que sexa equilibrada", dixo.
