#Tongo?... o xurado do 'Benidorm Fest ' deixa fóra de Eurovisión ás Tanxugueiras
Chanel, a preferida das integrantes españolas do xurado, será a representante do Estado no festival. Tanxugueiras foi a opción máis votada no voto popular e no voto demoscópico.
Por Galicia Confidencial | Compostela | 30/01/2022 | Actualizada ás 00:14
Tanxugueiras non representará ao Estado español en Eurovisión, malia ser a opción máis votada no voto popular e no voto demoscópico. A razón volveu ser o xurado 'profesional', que decidiu outorgarlle ás galegas uns escasos 30 puntos, deixando ás pandeireteiras sen ningunha posibilidade de ser as representantes do Estado. A elixida será, xa que logo, Chanel, a "preferida" das integrantes españolas dese xurado.
O tratamento do xurado ao grupo galego volveu suscitar apupadas por parte do público e, unha vez se coñeceu o resultado final das votacións, puidose escoitar no 'Benidorm Fest' ao público coreando 'Tanxugueiras' e 'Rigoberta', que eran as súas preferidas.
As galegas volveron realizar unha actuación maxistral e incidiron en que representaban a un Estado diverso con linguas e culturas diferentes e, sobre todo, ás mulleres, das que mama a súa música. Pero ao xurado, iso non lle importou. Volveu facer como fixo nas semifinais e relegalas á quinta posición, sen posibilidade xa dunha remontada.
Aos poucos segundos de coñecerse a decisión do xurado, as redes fervían asegurando que se trata dun novo "tongo" xa que as preferidas desde un primeiro momento eran Rigoberta Bandini e as Tanxugueiras que quedaron de segundas e terceiras, respectivamente.
