O PP escolle a un conselleiro de Fraga para "controlar" as contas da Xunta "con independencia"
Tomás Pérez Vidal vén de ser electo para facer parte do Consello de Contas xunto con José Antonio Redondo López, que revalida praza, e Anxo Ramón Calvo Silvosa.
Por Europa Press / Redacción | SANTIAGO DE COMPOSTELA | 01/02/2022 | Actualizada ás 12:30
Os tres membros electos do Consello de Contas --Anxo Ramón Calvo Silvosa, a proposta do BNG; e José Antonio Redondo López (que cumpre seis anos no cargo) Tomás Pérez Vidal, a proposta do PPdeG-- xuraron os seus cargos tras ser designados polo Parlamento de Galicia o pasado mes de novembro. No caso de Pérez Vidal, trátase dun vello coñecido da política galega, xa que foi conselleiro de Agricultura con Manuel Fraga a finais dos 90.
Fano coa misión, en palabras do xefe do Lexislativo autonómico, Miguel Santalices, de levar a cabo un "esforzo didáctico" para dar a coñecer aos cidadáns que a xestión política "está sometida a unha fiscalización dobre", por unha banda a intervención previa e, por outro, a posterior por parte do Consello de Contas e o Tribunal de Contas --en función do ámbito competencial, este último estatal--.
Con isto, dixo Santalices, pediu que o Consello se esforce "en dar a coñecer este traballo, para que a cidadanía sexa consciente de que os seus impostos están en boas mans, xestiónanse con rigor e conforme á lei, sen atallos de ningún tipo, como debe de ser", concluíu o presidente do Parlamento autonómico, nun acto no que estivo o presidente da Xunta, Alberto Núñez Feijóo.
Así mesmo, lembrou que todos os membros que acaban de ser elixidos "asumen a obrigación de velar polo interese xeral, con independencia da militancia previa", posto que "por encima dunha e outra sigla, está o interese xeral de Galicia" e "con ese obxectivo acaban de ser investidos".
Na súa intervención, Calvo Silvosa manifestou a "gran honra" de asumir esta "gran responsabilidade" co Parlamento e, polo tanto, a sociedade galega, e afirmou que toda a súa "actuación sempre irá" destinada a "a mellora dos poderes públicos". "Traballarei arreo como órgano de control, con total independencia", dixo, para que os informes de fiscalización "sigan sendo elementos útiles", máis aló do cumprimento meramente "formal" das obrigacións.
Pérez Vidal expresou a "emoción" por pasar a formar parte desta institución creada ao abrigo do Estatuto de Autonomía, uns inicios da Galicia autonómica da que el formou parte, presidindo incluso a institución que agora o elixiu, e da que foi membro catro lexislaturas. "Se a emoción é grande, o compromiso ha de ser maior", proclamou, antes de comprometer todo o seu "traballo e esforzo" con esta institución. "Sempre é unha honra servir a Galicia", remarcou.
Pola súa banda, Redondo destacou os seus máis de seis anos como conselleiro maior do órgano fiscalizador, sentiu o "orgullo" de que, nestes "tempos tan complexos" os parlamentarios puxéronse de acordo, demostrando que "non é tan difícil cando debe primar o interese xeral". Ademais, destacou os retos conseguidos, como a aprobación da declaración institución de compromiso ético, a apertura dunha canle de denuncias e a aprobación do plan de riscos de xestión, entre outras actuacións nos últimos anos.
