Repulsa do Concello de Santiago ao concerto de Kaydy Cain, cuxas cancións "denigran" ás mulleres
"Estamos en contra de calquera cultura audiovisual e musical, que agride violentamente ás mulleres e á súa dignidade", sinalan desde o consistorio compostelán.
Por E.P. | Santiago de Compostela | 08/02/2022 | Actualizada ás 19:57
A concellaría de Políticas de Igualdade do Concello de Santiago, así como os grupos municipais do PSdeG, Compostela Aberta e BNG, manifestaron a súa repulsa polo concerto que o cantante de trap, Kaydy Cain, ten previsto ofrecer este xoves nun espazo privado da cidade compostelá, posto que consideran as súas letras "vejatorias" e "denigrantes" para as mulleres.
"Estamos en contra de calquera cultura audiovisual e musical, que agride violentamente ás mulleres e á súa dignidade. Somos un Concello que traballa a favor da igualdade, declarado libre de violencias machistas, polo que mostramos a nosa desconformidade coa celebración de calquera tipo de acto sexista no que se faga apoloxía do machismo", declaran.
É por este motivo que, aseguran, sitúanse "en contra deste tipo de concertos" e esixen "respecto" para a figura das mulleres "en todo tipo de actos públicos e privados".
Tamén o municipio de Mos expresou o seu rexeitamento este pasado luns á actuación que o cantante de trap ten prevista ofrecer o vindeiro venres nunha sala de concertos da localidade. Fixérono, todos os grupos municipais, mediante unha declaración institucional.
O cantante xa tivo varias polémicas debido ás súas letras e videoclips. Hai apenas unhas semanas mesmo foi acusado, en redes sociais, de abusar sexualmente de varias mulleres; acusacións que el negou.
