Unha homenaxe ao fotoxornalismo de guerra: "si paga a pena"
Unha exposición recolle o traballo destes profesionais que, moitas veces, arriscan a súa vida por contarnos o que pasa no mundo.
Por Europa Press / Redacción | Santiago de Compostela | 17/02/2022 | Actualizada ás 21:00
A exposición "Creadores de conciencia. 40 fotoperiodistas comprometidos" de DKV Seguros foi inaugurada o pasado 16 de febreiro no Auditorio de Galicia de Santiago de Compostela. Esta obra rende homenaxe a profesionais da fotografía do Estado español que arriscan a súa vida en conflitos bélicos, desastres naturais ou réximes autárquicos.
Trátase dunha exposición itinerante comisariada por Chema Conesa que ademais de remover conciencias para que ninguén se desentenda das inxustizas, os abusos e a dor humana, homenaxea a unha xeración de fotoxornalistas que reflectiron con imaxes momentos trascendentais da historia recente, ás veces en situacións precarias e asumindo riscos.
O acto contou coa participación do alcalde, Xosé A. Sánchez Bugallo, a concelleira responsable de Acción Cultural, Mercedes Rosón Ferreiro, o fotógrafo José Cendón, Carlos López Cachaza, director da sucursal A Coruña e Lugo de DKV Seguros e Silvia Modia, subdirectora do Auditorio de Galicia.
O alcalde agradeceu a DKV "a posibilidade que nos ofrece de compartir estas fotografías e de gozar, de sentir e de aprender a través delas. E por suposto agradecer aos fotógrafos o seu formidable traballo".
José Cendón, fotógrafo da exposición, explicou que "este oficio non paga a pena. Que che secuestren ou que resultes ferido nun pé como Emilio Morenatti, para que paguen mal... Pero á vez, se non estamos alí, esa historia que estamos a presenciar non existiría. Se non explicamos as historias, non nos decatariamos e non existirían. Por suposto que non paga a pena, pero si que paga a pena...", explica Cendón.
E tamén quiso agradecer ás entidades e empresas que apostan por esta disciplina fotográfica: "agradecer ao Consello e ao Auditorio de Galicia por apoiar iniciativas como esta, pero sobre todo a DKV, que organiza esta exposición sobre fotoxornalismo. DKV non só organiza esta exposición, senón que ademais páganos por iso".
Por último, Carlos López Cachaza, director da sucursal A Coruña e Lugo de DKV lembrou que "esta exposición produciuse con motivo do XX aniversario das nosas accións de Responsabilidade Social e desde a súa inauguración en Barcelona xa pasou por Madrid, Zaragoza, Xixón, Sevilla, San Sebastián, Málaga e agora chega a Galicia. En total xa tivo máis de 125.300 visitantes.
