Adeus á banca presencial? Unha entidade sen oficinas irrumpe en Galicia
O Banco Mediolanum suma 17.578 clientes no país, o que supón un incremento do 18,1%.
Por Europa Press / Redacción | SANTIAGO DE COMPOSTELA | 23/02/2022 | Actualizada ás 12:13
Banco Mediolanum pechou o exercicio 2021 en Galicia cun patrimonio de 761 millóns de euros, un 20,1% máis que o ano anterior, e cun total 17.578 clientes, o que supón un incremento do 18,1%. O ano acabou en Galicia cun total de 142 Family Bankers (asesores financeiros da entidade), un 13,6% máis respecto de 2020, informa o banco este mércores nun comunicado.
A responsable de Banco Mediolanum na Zona Norte, Ivonne Pousa, afirmou que "Galicia é unha zona con moito potencial" e onde os seus Family Bankers traballan coa vontade de que se converta nunha das comunidades máis significativas para a entidade en volume de negocio.
Co proxecto solidario Mediolanum Aproxima, a entidade celebrou en Galicia 9 iniciativas ao longo do ano para contribuír e difundir o labor de 9 ONG da zona. En toda España, o banco pechou o ano cun beneficio de 13,8 millóns, un 24,5% menos que o ano anterior, tras outorgar 2.000 euros a cada empregado e 'family banker' polo 40 aniversario de Grupo Mediolanum.
O exercicio acabou cun patrimonio xestionado de 8.985 millóns, o que constitúe un aumento dos recursos totais de clientes nun 24,2%; alcanzáronse os 1.504 Family Bankers, un 14,1% máis; o número de clientes creceu un 18,9%, ata os 186.277; e rexistrouse un CET1 do 18,75%, que marca o nivel de solvencia.
O banco converteuse por terceiro ano consecutivo na entidade cos clientes máis satisfeitos de toda a banca española, segundo o estudo Benchmarking de Satisfacción de Clientes 2021 da consultora independente Stiga.
