O metal galego perdeu emprego pero aumentou a súa facturación en 2021

O sector metalúrxico galego, que engloba actividades como a automoción, o naval, a aeronáutica ou as estruturas metálicas, pechou o ano 2021 cunha facturación de 12.639 millóns de euros, o que supón un 5% máis que en 2020, pero perdeu un 0,5% do emprego, situándose nos 57.053 traballadores.

Así se recolle no Informe Anuel do Sector Metal 2021 presentado este venres pola Asociación de Industrias do Metal e Tecnoloxías Asociadas de Galicia (Asime), que indica que a pesar de que a nivel nacional o emprego no sector subiu un 0,57%, ata 765.500 traballadores, en Galicia esta cifra baixou un 0,5%, con 290 empregados menos.

Por provincias, A Coruña e Pontevedra aglutinan case o 85% do emprego do sector en Galicia. En 2021, o metal representou o 20% do Produto Interior Bruto (PIB) galego, con 3.724 empresas e 12.639 millóns de facturación. Así mesmo, o 41,2% das exportacións totais galegas corresponderon o exercicio pasado ao sector do metal, cuns 10.558 millóns de euros, crecendo un 13,4% respecto de 2020 e situándose como a cuarta comunidade autónoma que máis envía fóra produtos do metal, só por detrás de Cataluña, País Vasco e Madrid.

O 66,8% destas exportacións foron vehículos de motor e un 5,2% corresponderon ao sector naval. Só en Pontevedra concentráronse o 77% das exportacións, con 8.123 millóns de euros. En canto ás importacións, situáronse nos 9.026 millóns de euros, un 12,6% máis e na quinta posición a nivel nacional.

AUTOMOCIÓN, METALMECÁNICA E TRANSPORTE

No apartado de automoción, metalmecánica e transporte, o número de traballadores situouse nas 19.566 persoas, un 0,65% menos que en 2020, mentres que a facturación subiu un 5%, ata 9.264 millóns de euros. A fabricación de vehículos baixou en Galicia un 34,5%, ata 325.082 unidades, despois de que en 2020 aumentase un 22%.

Aínda así, a automoción liderou as exportacións metálicas da Comunidade, aumentando un 4,7%, ata 7.048 millóns de euros, mentres que as importacións subiron tamén un 7,9%, con 5.588 millóns de euros. Por todo iso, desde Asime destacaron que o reto actual da automoción galega é a crise dos microchips e o cambio ao vehículo eléctrico, polo que é necesario atraer novos investimentos.

NAVAL, MARÍTIMA E ENERXÍAS MARIÑAS

En 2021, os estaleiros galegos perderon o primeiro posto a nivel estatal, con sete novos contratos e cunha carteira de pedidos de 14 unidades, co 33% do total toda España, por detrás do País Vasco, que ten o 37% do total. Así, as exportacións da construción naval aumentaron un 66,8%, ata 553,7 millóns de euros, mentres que as importacións subiron un 78,2%, ata 11,78 millóns. En canto ao emprego, baixou un 1%, ata 8.037 persoas, cunha facturación de 801 millóns, un 3% máis.

Asime lamentou que o naval galego está a perder capacidade "de forma preocupante" polo que pide que se recupere a actividade en Barreras e a aposta pola eólica mariña. As construcións e estruturas metálicas empregaron 16.127 persoas en Galicia, un 0,5% máis que en 2020, ingresando 487 millóns de euros, un 5% máis. Pola súa banda, a aeronáutica e aeroespacial empregou a 1.226 persoas, dato similar ao exercicio precedente, con 89 millóns de euros de facturación, un 6% máis.

Desde a asociación puxeron en valor a oportunidade que supoñen os fondos europeos para o metal galego e destacaron a importancia da relocalización do tecido produtivo para evitar a dependencia doutros países. Entre outras reflexións, Asime indicou a "incerteza" que supón para o sector a guerra de Ucraína, que está a encarecer os custos das materias primas e dificultando a súa subministración.

Enrique Mallón, de Asime.. ASIME | Fonte: Europa Press