Denuncian desabastecementos en diferentes mercados durante a terceira xornada de paro no transporte

Galicia vive este mércores a terceira xornada do paro no transporte, que provocou cortes en vías como a autovía A-8 ao seu paso por Vilalba, así como barricadas en zonas como Nadela ou Pedrafita. Igualmente, os piquetes actuaron en diferentes portos e polígonos, como a contorna de San Cibrao das Viñas.

Así, comezaron a verse desabastecementos en supermercados de determinados produtos, con especial problemática nos peixes, ao que se une o amarre dalgunhas frotas pola subida do gasóleo. Por parte das lonxas de Celeiro e Burela explicouse a Europa Press que non se realizou poxas por segundo día consecutivo, mentres otas como as de Vigo e A Coruña traballaron a menor ritmo do habitual.

De feito, a Federación Española de Industrias de Alimentación e Bebidas (FIAB) denunciou "graves problemas" no funcionamento da cadea alimentaria debido ao bloqueo que se está producindo nalgunhas estradas españolas pola folga de transportes.

A modo de exemplo, ás 13,30 horas, en Nadela, en Lugo, aínda seguían uns 70 piquetes nunha rotonda que cortaban este nó de comunicacións en todas as saídas, con varios camións aparcados na contorna de Merkamueble.

DESABASTECEMENTO

Ante esta situación, o presidente dos armadores de Vigo (ARVI), Javier Touza, explicou que se comunicou coa Delegación do Goberno para que se garanta a protección dos transportistas, mentres resalta o risco existente para os alimentos perecedoiros. Sinala que esta mañá de mércores estivo en contacto coa lonxa de Vigo, onde se vendeu unha "parte pequena", pero "unha parte importante" meteuse en cámara ao non haber transporte para o resto de España.

Nun comunicado, o Porto de Vigo informou de que a actividade "empeza a resentirse", sobre todo no que respecta ao funcionamento do porto pesqueiro do Berbés, onde se descarga e poxa pescado e marisco procedente de todas as partes do mundo. Afecta os transportes con rumbo aos grandes mercados centrais, como Mercamadrid ou Mercabarna. "No entanto, o transporte cara a pescaderías, mercados locais ou supermercados segue funcionando", agrega.

En Vigo, a pasada madrugada houbo menos compradores dos habituais. No entanto, descargáronse unhas 75 toneladas de peixe entre a lonxa, destinada á primeira venda, e o mercado, onde se atopa o xénero destinado á segunda venda.

Nesta liña, a Asociación Galega de Comercializadores de Marisco (Agacomar) e a Confederación de Empresarios de Pontevedra (CEP) resaltan que os piquetes e os custos de enerxía "ameazan ao sector galego de comercialización de marisco".

"As perdas económicas son cuantiosas. Están a impedirnos desenvolver a nosa actividade", advirte o presidente de Agacomar, Abelardo Rodríguez. Estas entidades piden que se escolte aos transportistas que teñan como destino MercaMadrid, MercaBarna, ou outras grandes plataformas de distribución, como as de Sevilla ou Bilbao.

Pola súa banda, as organizacións agrarias alertaron de que periga a recollida de leite a partir deste xoves, así como o futuro abastecemento en fresco de pito, porcino e produtos de horta, entre outros. En Santiago, a feira de gando de Amio suspendeuse ao non levar animais.

PRIMEIRA MULTAS

Esta situación conflitiva con momentos de tensión nos últimos días, nos que se produciron enfrontamentos con piquetes e rodas picadas de camións, provocaron as primeiras multas.

Fontes de transportistas consultadas por Europa Press sinalan que, na xornada do martes na que decenas de camioneiros levaron os seus vehículos ata a Xunta, a Policía tomou datos dos participantes por obstaculizar a vía, aos que avisaron de multas de 600 euros.

Nadela, Lugo. Terceira xornada de paro de transporte. Cortes de piquetes en Pedrafita, Meira, Vilalba, Rábade e Nadela. Na imaxe, vista da chaira á que os folguistas apartaron os camións na mañá do miercoles, 16 de marzo. CARLOS CASTRO/EUROPA PRESS / Europa Press