Por E.P. | SANTIAGO DE COMPOSTELA | 22/03/2022 | Actualizada ás 17:15
CIG-Saúde denuncia o "incumprimento do contrato de servizo de transporte sanitario aéreo do 061" por "falta de persoal" debido á ausencia de pilotos "para cubrir todo o contrato". Así informou este martes nun comunicado de prensa este sindicato, sinalando que ese servizo de transporte sanitario en helicóptero préstase " durante menos tempo do contratado por falta de persoal".
Respecto diso, explica que o contrato formalizado en 2019 establece que o período de servizo "será todos os días do ano de orto a ocaso" e desde o pasado 19 de marzo "ese período entre orto e ocaso supera as 12 horas de luz --tempo de xornada que pode voar un piloto--.
Por iso, CIG-Saúde critica que o servizo se presta "só por 12 horas ante a falta de pilotos para cubrir todo o horario do contrato". Este incumprimento, asegura, afecta tanto o helicóptero con base en Santiago de Compostela como ao de Ourense.
MÁIS DE 12 HORAS
En concreto, esta central sindical sinala que, por exemplo, este 22 de marzo o día durará 12 horas e 13 minutos e o vindeiro domingo 12 horas e 28 minutos en Santiago; "sen que se saiba ata cando a falta de pilotos suficientes fará incumprir o contrato asinado entre a Fundación Pública Urxencias Sanitarias de Galicia-061 e Eliance Global Services S.L., concesionaria do servizo".
Ademais, para o sindicato esta circunstancia "supón un prexuízo" para os usuarios do Sergas que, matiza, "quedarán privados deste medio de atención ás emerxencias nas últimas horas do día".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.