Denuncian a vulneración dos permisos de conciliación, tamén polas administracións públicas
CC.OO. denuncia os obstáculos que se atopan os traballadores e, en especial, as traballadoras que exercen estes dereitos.
Por Europa Press / Redacción | SANTIAGO DE COMPOSTELA | 23/03/2022 | Actualizada ás 13:06
Oito de cada 10 persoas que fan uso das ferramentas e permisos de conciliación son mulleres, segundo informa CC.OO. con motivo do Día da Conciliación e a Corresponsabilidade, no que o sindicato denuncia "os numerosos obstáculos que se atopan os traballadores e, en especial, as traballadoras que exercen" estes dereitos.
A secretaria de Muller e Igualdade de CC.OO., Mamen Sabio, aproveitou esta data para denunciar que estes dereitos de conciliación sexan "sistematicamente vulnerados" por moitas empresas, a pesar de estar regulados legalmente, algo que cobra "un cariz especialmente grave" no caso das administracións públicas.
Segundo Sabio, os servizos xurídicos do sindicato "gañan cada ano numerosas sentenzas" que recoñecen os dereitos de conciliación "fronte ás negativas" das empresas ou das administracións.
"A máis recente, fai menos dunha semana, condena ao organismo público Consorcio Galego de Servizos de Igualdade e Benestar por negarlle a unha traballadora o dereito a gozar dun horario compatible coa atención e coidado dos seus proxenitores", destacan.
Para a sindicalista, "é gravísimo" que unha entidade pública como esta, cuxa misión é prestarlle á cidadanía servizos de conciliación, "vulnere deste xeito os dereitos dunha traballadora".
BRECHA DOS COIDADOS
En canto á corresponsabilidade, un informe presentado por CC.OO. o pasado mes de febreiro sinala que as mulleres asumen "case en exclusiva" as obrigacións relacionadas cos coidados. Iso tradúcese, por exemplo, en que sexan maioría na contratación a tempo parcial (un 15,6% máis de mulleres que de homes) ou nas reducións de xornada e uso de excedencias para coidado de familiares.
Máis en concreto, as mulleres representan o 80% das persoas que se acollen a opcións de conciliación, sobre todo en solicitudes de ausencia do posto de traballo por causas familiares. "Isto significa que os coidados, na nosa sociedade, están extremadamente feminizados e estamos aínda moi lonxe dunha corresponsabilidade real e efectiva", conclúe Mamen Sabio.
