Atopan en bo estado de saúde a dous senderistas que se perderon nunha zona de monte na Teixeira

Os equipos de emerxencia mobilizados atoparon en bo estado de saúde a dous senderistas perdidos nunha zona de monte na contorna da parroquia de Pedrafita, no concello ourensán da Teixeira.

Segundo informou o 112 Galicia, debido ás condicións do terreo, as tarefas de rescate prolongáronse durante cinco horas, para a localización das persoas e trasladalas con seguridade ata o punto no que se atopaba o seu vehículo.

Foron, pasados uns minutos das 19,30 horas deste domingo, os propios implicados os que chamaron ao 112 Galicia para solicitar axuda. Durante a comunicación cos xestores de emerxencias, indicaron que se perderon ao tentar localizar a ruta que conducía á pasarela do Río Mao.

Tras iso, por parte do Centro Integrado de Atención ás Emerxencias de Galicia púxose a situación en coñecemento dos membros do GES de Castro Caldelas, dos axentes da Garda Civil e dos efectivos de Protección Civil de Parada de Sil.

Con todo, grazas ao envío das coordenadas a través do móbil, facilitou a súa localización aos equipos de intervención, que puideron dar con eles sobre as 22,30 do domingo horas en bo estado de saúde.

Unha vez localizados, foron conducidos ata o lugar onde se atopaba o seu vehículo, posto que, estaban nunha zona escarpada de monte onde a configuración do terreo dificultaba o desprazamento dos implicados no rescate, indicaron as mesmas fontes. Deste xeito, despois de cruzar o abrupto camiño, os senderistas puideron volver a casa poucos minutos despois das 1,00 horas deste luns.

Sendeirista facendo unha ruta de sendeirismo | Fonte: EP