Aprobadas novas axudas a familias para o acceso a libros de texto e material escolar

A Xunta destinará 25,6 millóns, un 47% máis que o curso anterior, para axudas ás familias no acceso a libros de texto e material escolar, segundo informou o presidente do Goberno galego, Alberto Núñez Feijóo, sobre os asuntos do Consello.

Feijóo expuxo que, coa entrada en vigor da LOMLOE nos cursos impares, o incremento do orzamento destinarase case todo a repor os manuais que pasan dun curso a outro.

Haberá axudas nos ensinos e cursos con materiais non reutilizables, que oscilarán entre os 140 e os 210 euros, segundo a renda, ata os 275 euros no caso de alumnos de educación especial e 210 para nenos en garda ou tutela.

Tamén haberá un fondo solidario de libros de texto no que poderán participar alumnos desde terceiro de Primaria ata cuarto da ESO e repartiranse os libros en orde inversa á renda. Haberá, así mesmo, axudas para a compra de material escolar, con 50 euros por alumno se a renda per cápita familiar é menor a 6.000 euros.

No ámbito dos centros educativos, informou tamén o acordo para dotar de equipamento aos colexios por un importe de case cinco millóns de euros.