O Concello de Santiago únese ás demandas para mellorar o servizo da Renfe en Galicia
Amosan o seu apoio á plataforma de afectados pola redución de servizos de media distancia.
Por E.P. | SANTIAGO DE COMPOSTELA | 03/05/2022 | Actualizada ás 14:17
O alcalde de Santiago de Compostela, Xosé Sánchez Bugallo, mostrou o apoio do Concello á Plataforma de afectados pola redución de servizos de media distancia da Renfe en Galicia, tras reunirse este luns con dous representantes da organización.
As delegadas da Plataforma, Reyes Abad e Cristina Fernández, mantiveron un encontro con Sánchez Bugallo e o edil de Mobilidade e Seguridade Cidadá, Gonzalo Muíños, para transmitirlles as súas reivindicacións e buscar apoio constitucional por parte do Consistorio da capital galega.
A plataforma demanda a Renfe a ampliación das frecuencias horarias dos trens que "se viron reducidas tras a chegada da alta velocidade a Galicia", segundo expuxo Reyes Abad. Solicitan que se faga un uso "eficiente" da infraestrutura xa presente na zona atlántica galega para así conseguir "unha mobilidade interprovincial real" adaptada a "os horarios dos traballadores".
O Concello de Santiago non é o primeiro ao que visita estes usuarios de tren, pois xa se reuniron cos gobernos municipais de Vilagarcía de Arousa, Redondela, A Coruña e Pontevedra, ademais da Subdelegación e a Delegación do Goberno en Galicia.
APOIO Á PLATAFORMA
As representantes destacaron o "bo" recibimento das súas peticións nas entidades municipais. En canto ao goberno da capital galega, Sánchez Bugallo anunciou que presentará unha declaración institucional ao pleno que "espera" que conte co apoio de "todos os grupos municipais".
"Non ten sentido que a chegada da alta velocidade a Galicia implique que a nosa conectividade interior empeore", declarou Bugallo. "Por iso, débese facilitar a interconexión interior de Galicia para pór en máximo nivel de operatividade a rede da que dispomos", aseverou o alcalde de Santiago.
