Os hostaleiros de Lugo rexeitan a implantación do novo rexistro de viaxeiros

O presidente da Asociación Provincial de Empresarios de Hostalaría e Turismo de Lugo (Apehl), Cheché Real, acompañado por dous membros da xunta directiva da Asociación, Jacobo García-Bobadilla e Manuel Ángel Fernández, reuniuse este venres con María Isabel López, subdelegada do Goberno en Lugo, para tratar o desenvolvemento do Real Decreto polo que se establece a obriga de rexistrar documentalmente as actividades de hospedaxe.

Esta nova normativa, apunta a asociación, "dá un xiro á regulamentación do Rexistro de Viaxeiros", que "se fai cada vez máis complexa", algo que quixeron trasladar á subdelegada.

"Debería ser acordada co sector, xa que se fai difícil cumprir co contido do Real Decreto tal e como o indican os termos actualmente expostos", asegurou Real. Ademais, engadiu, "o sector considera que esta norma podería resultar contraria á normativa en materia de protección de datos de carácter persoal".

Tras a reunión, a subdelegada informou de que os responsables da Asociación xa trasladaron aos seus asociados que, de momento, mantense o actual sistema de rexistro de viaxeiros. O Ministerio do Interior, apuntou María Isabel López, está en contacto co sector para buscar fórmulas que "permitan resolver os problemas que puidese ocasionarlles aos hostaleiros a aplicación" deste novo rexistro.