Por Europa Press / Redacción | Madrid | 12/05/2022 | Actualizada ás 18:25
A Sociedade Estatal de Participacións Industriais (SEPI) deu o visto e prace preliminar ao expediente de Celsa --que conta coa planta de Celsa Atlantic no concello coruñés da Laracha-- para o seu rescate por 550 millóns de euros, explicaron fontes coñecedoras do proceso. O rescate, solicitado a mediados de 2020, levarase a cabo a través do fondo de apoio á solvencia das empresas estratéxicas (Fasee), segundo adianta a diario 'Expansión'.
A SEPI concluíu o 15 de marzo a análise da solicitude con cargo ao Fasee solicitada por Celsa, quen aceptou os termos e condicións fixados polo Fasee para a concesión da axuda. Este rescate deberá pasar polo consello xestor do fondo, pero antes os acredores deberán sumarse a esta operación de financiamento para a compañía.
Os acredores que compraron a débeda de Celsa son Sculptor, CVC, SVP, Goldman Sachs, Golden Tree, Cros Ocean, JP Morgan, Attestor e Deutsche Bank. Así, a compañía con sede en Castellbisbal (Barcelona) recibirá previsiblemente os 550 millóns a través dun préstamo participativo duns 280 millóns e outro ordinario de 270, segundo as mesmas fontes.
Como o préstamo participativo supera os 250 millóns de euros, a axuda require validación da Comisión Europea, previa á autorización por parte do Consello de Ministros.
O grupo, que conta cunha débeda superior aos 2.000 millóns de euros en España, pechou 2021 cunha facturación de 5.300 millóns e un ebitda ao redor dos 600 millóns a nivel global, e conta con 4.500 traballadores no Estado e preto de 10.000 en toda Europa.
O fondo xestionado pola SEPI aprobou desde a súa formalización ata finais de abril 19 expedientes por un importe de 2.125 millóns de euros, o que supón o 40% dos 5.310,5 solicitados, segundo os datos actualizados facilitados polo holding público.
Ademais, o Fondo, dotado con 10.000 millóns de euros, formalizou ata esa data o peche de expedientes correspondentes a solicitudes non elixibles por valor de 444,7 millóns.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.