A DGT inicia unha campaña para prever atropelos nas estradas galegas
Centrarase en peóns e motoristas.
Por E.P. | SANTIAGO DE COMPOSTELA | 20/05/2022 | Actualizada ás 12:14
A Dirección Xeral de Tráfico (DgT) e a Agrupación de Tráfico da Garda Civil inician este luns, día 23, unha campaña de sensibilización sobre o colectivo de usuarios vulnerables nas estradas galegas. A iniciativa, que se prolongará ata o domingo día 29, centrarase na seguridade de peóns, ciclistas e motoristas, segundo informa a Delegación do Goberno. Esta campaña levarase a cabo de forma exclusiva na comunidade autónoma galega por iniciativa das xefaturas provinciais de Tráfico e o sector de Galicia da Garda Civil.
De acordo cos datos de accidentalidade en vías interurbanas de Galicia, en 2021 o 33% das persoas falecidas na estrada pertencían ao colectivo de vulnerables. Entre o 1 de xaneiro e o 15 de maio deste ano repetiuse esta porcentaxe ao contabilizarse 4 motoristas e 5 peóns falecidos, o que supón que tres de cada dez vítimas mortais nas estradas de Galicia forman parte deste grupo.
SISTEMAS DE PROTECCIÓN
A campaña centrarase na sensibilización e persegue un dobre obxectivo. Por unha banda, concienciar a peóns, ciclistas e motoristas sobre a súa vulnerabilidade na estrada e lembrar a necesidade de facerse visibles e usar os sistemas de protección específicos como os cascos, así como a indumentaria adecuada para circular con bicicletas e motocicletas.
Xunto a este obxectivo, un segundo é o sensibilizar aos condutores e condutoras sobre a elevada exposición ao risco destes usuarios e a necesidade de manter o nivel de alerta constante ante a súa presenza na vía. Con este dobre obxectivo, os equipos da Agrupación de Tráfico da Garda Civil entregarán elementos reflectores de alta visibilidade a camiñantes ou peóns que se despracen polas vías sen facer uso deste tipo de pezas e repartiranse trípticos a ciclistas, a motoristas e a condutores doutro tipo de vehículos coas normas e recomendacións para ambos.
Por outra banda, a Delegación do Goberno precisa que as persoas usuarias en situación de vulnerabilidade son aquelas que, ben polas súas características físicas ou ben polo medio de desprazamento empregado, teñen máis probabilidade de verse implicadas nun accidente de tráfico ou de resultar mortas ou feridas a consecuencia do mesmo.
