A Audiencia Nacional apraza a declaración dos sobreviventes do 'Villa de Pitanxo' ao 6 de xuño

A Audiencia Nacional aprazou ata o próximo 6 de xuño a declaración do tres sobreviventes do naufraxio do pesqueiro galego 'Villa de Pitanxo', que se afundiu a 450 quilómetros da costa de Terranova (Canadá) o pasado 15 de febreiro. Desta maneira, segundo informou a AN, os sobreviventes á traxedia non acudirán a declarar o vindeiro martes, 31 de maio, como estaba previsto, senón que o farán o luns da semana seguinte a partir das 09,30 horas.

Tal como explicou a AN nunha providencia, este adiamento prodúcese tras a petición dunha das procuradoras para poder preparar o interrogatorio.

Ademais, o tribunal estableceu que os tres sobreviventes terán que declarar de forma presencial en Madrid, a pesar de que se solicitou facelo por videoconferencia, o cal foi rexeitado.

A semana pasada a Audiencia Nacional convocou o patrón do 'Villa de Pitanxo', Juan Padín, a declarar como investigado no seu Xulgado de Instrución número 2, en Madrid, despois de que o tribunal dese por personados a varios dos familiares das vítimas.

Padín será o único dos tres sobreviventes que declarará como investigado na causa, mentres que o seu sobriño, Eduardo Rial, e o mariñeiro Samuel Kwesi farano como testemuñas ese mesmo día.

A pesar diso, a Audiencia Nacional aínda non se declarou competente para investigar o caso do afundimento do pesqueiro galego, pero si deu un paso máis nas dilixencias da causa xa que, segundo fontes xurídicas, si lle compete comezar ditas dilixencias debido a que ten coñecemento da causa, sobre todo as urxentes.

Máis tarde xa levarán a cabo os trámites para decidir quen é o xulgado competente, que previsiblemente terá que ser o Tribunal Supremo quen o sinale.

Isto ocorre despois de que o xuíz da AN Ismael Moreno emitise un auto asegurando a existencia de indicios que permitirían imputar "polo menos 21 delitos de homicidio por imprudencia grave e contra os dereitos dos traballadores" a Padín.

A Audiencia Nacional puxo en "dúbida" a versión ofrecida por Juan Padín, o patrón do pesqueiro, indicando que a velocidade do buque ás horas da traxedia "suscita dúbidas" sobre a declaración do capitán acerca da parada dos motores por avaría como causa determinante da escora e posterior afundimento do barco.