Os casos covid volven superar o milleiro de contaxiados diario
Baixan a 441 os ingresados por Covid en Galicia e aumentan a 10.967 os casos activos.
Por Europa Press / Redacción | SANTIAGO DE COMPOSTELA | 17/06/2022 | Actualizada ás 11:29
Os pacientes hospitalizados pola Covid-19 en Galicia descenden a 441, que supoñen sete menos que a xornada anterior, mentres que os casos activos seguen en ascenso e sitúanse en 10.967, que implican 811 máis, tras rexistrarse 1.087 novos contaxios. Pola súa banda, a taxa de positividade mantense nun 38 por cento no conxunto de Galicia.
Segundo os datos actualizados este venres pola Consellería de Sanidade, con rexistros ata as 18,00 horas do xoves, recollidos por Europa Press, descenden a 15 os pacientes en UCI pola Covid-19 en Galicia --dúas menos-- e a 426 os hospitalizados noutras unidades --cinco menos--, mentres que 10.526 pacientes permanecen en seguimento no seu domicilio. Hai unha semana, o venres 10 de xuño, había 419 ingresados, 15 deles en UCI.
Por áreas sanitarias, a presión hospitalaria alíviase en tres das sete: Ourense, Pontevedra-O Salnés e Ferrol; mantense na de Santiago e Barbanza; e aumenta lixeiramente nas outras tres: A Coruña-Cee, Vigo e Lugo.
No caso concreto de Ourense mantéñense dous pacientes Covid en UCI e descenden a 64 os hospitalizados noutras unidades --sete menos--; mentres que na de Pontevedra e O Salnés seguen catro en críticos e baixan a 59 os doutras unidades --dúas menos--. Polo seu lado, a área de Ferrol mantense como a única sen hospitalizados pola Covid-19 en UCI e rexistra 22 pacientes ingresados noutras unidades --tres menos--. Mentres, na de Santiago e Barbanza continúa un en críticos e 48 noutras unidades --sen cambios--.
Na área da Coruña e Cee mantéñense cinco hospitalizados pola Covid-19 en UCI e hai 90 noutras unidades --tres máis--; mentres que na de Lugo segue un en críticos e aumentan a 59 os doutras unidades --un máis--. E na área sanitaria de Vigo aínda que descenden a dúas os pacientes ingresados pola Covid-19 en UCI --dous menos--, aumentan a 854 os hospitalizados noutras unidades --tres máis--.
CASOS EN AUMENTO
Desde este pasado martes os casos activos seguen en aumento por cuarta xornada consecutiva e alcanzan os 10.967, que implican 811 máis que o día anterior, ao haber máis contaxios (1.087) que altas (273), ao que se engaden tres falecidos. O venres anterior, 10 de xuño, había 9.376 infeccións activas.
O ascenso é xeneralizado nas sete áreas sanitarias galegas, coa de da Coruña e Cee con maior incremento (+187), seguida da de Vigo (+136), Santiago e Barbanza (+129), Lugo (+106), Pontevedra e O Salnés (+106), Ourense (+95) e Ferrol (+49). Así, a área da Coruña e Cee colócase con máis casos activos, con 2.350, seguida da de Vigo, con 2.309; Santiago e Barbanza, con 1.800; Ourense, con 1.435 e Pontevedra e O Salnés, con 1.286; e Lugo, con 1.194; mentres que por baixo do milleiro mantense só a de Ferrol, con 580.
A incidencia no grupo de idade de 60 a 69 anos ascendeu a 14 días a 682,73 casos por 100.000 habitantes; no de 70 a 79 anos a 723,51; e no de maiores de 80 anos subiu a 794,35.
CONTAXIOS
Os contaxios na última xornada sitúanse en 1.087, que implican 162 menos que os 1.249 do xoves, tras os 1.198 do mércores e 926 de martes, despois de comezar esta semana comeza con 482 novos casos de Covid-19 abertos nas últimas 24 horas. Co novo protocolo xa non se contabilizan os autotest positivos e non se fan probas de diagnóstico a poboación en xeral, salvo á vulnerable. O venres 10 de xuño houbo 929 novos casos abertos.
E a taxa de positividade --número de PCR positivas por cada 100 realizadas-- mantense nun 38,3 por cento, tras baixar ao 38,96% este xoves; repuntar ao 40,43% o mércores, descender ao 28,37% o martes e arrincar esta semana no 30,42%. Así, mantense por encima do 5% que marca a OMS para dar por controlada a pandemia.
FALECIDOS
As vítimas da pandemia da Covid-19 en Galicia rexistradas na web do Sergas ascenden 3.553 despois de notificar a Consellería de Sanidade este venres tres falecementos de pacientes con patoloxías previas. En concreto, o 14 de xuño faleceu un home de 83 anos na área sanitaria de Vigo e o día 15 unha muller de 73 na da Coruña e Cee e un home de 96 na de Pontevedra e O Salnés.
