Convocados os premios 'Exceleite' ás mellores explotacións leiteiras de Galicia
Poderán optar a estes recoñecementos todas aquelas que realizan os seus autocontrois de calidade no Laboratorio Interprofesional Galego de Análise do Leite.
Por Europa Press / Redacción | SANTIAGO DE COMPOSTELA | 27/06/2022 | Actualizada ás 12:41
A Xunta convoca os premios á excelencia da calidade hixiénico-sanitaria de produtores galegos de leite cru de vaca, coñecidos como premios 'Exceleite'. Así o recolle a orde da Consellería do Medio Rural que publica este luns o Diario Oficial de Galicia (DOG).
O obxectivo, sinala a Xunta nun comunicado, é recoñecer aquelas gandeiras e gandeiros máis comprometidos co seu traballo e, por tanto, coa calidade do leite que producen. Estes premios distinguen as granxas en tres categorías en función do seu tamaño --pequenas, medianas e grandes-- e, á súa vez, cada unha delas subdivídese en tres grupos segundo o seu sistema de produción --intensivo, semiextensivo ou extensivo--. Ademais, recoñécense especificamente as mellores explotacións ecolóxicas.
Poderán optar a estes recoñecementos todas as explotacións leiteiras de gando vacún de Galicia que realizan os seus autocontrois de calidade no Laboratorio Interprofesional Galego de Análise do Leite (Ligal). Deste xeito, deberán constar na base de datos deste centro os resultados das mostras de leite correspondentes ao período de referencia, isto é, desde agosto de 2021 a xullo de 2022.
Así mesmo, as explotacións deberán atoparse de alta no Rexistro de Explotacións Leiteiras de Calidade Diferenciada (Recaldi) e, no caso das ecolóxicas, deberán estar inscritas no Consello Regulador da Agricultura Ecolóxica de Galicia (Craega), así como cumprir outras características técnicas.
