Pontevedra acolle campamentos para que as crianzas ucraínas teñan "un verán normal"

Que as crianzas ucraínas desprazadas pola guerra e acollidas temporalmente en Galicia pasen "un verán normal", con actividades habituais para a súa idade, é o obxectivo que se expoñen os campamentos que Afundación puxo en marcha na Residencia de Estudantes de Pontevedra e que, en catro quendas, chegarán ata o 18 de agosto.

A iniciativa, que arrincou oficialmente este luns coa primeira quenda de 17 crianzas e 8 adultos, foi presentada este martes pola coordinadora adxunta da área de Educación de Afundación, Carlota Sánchez-Montaña Puga, e a presidenta de AGA-Ucraína, Natalia Afonina. En total serán catro quendas, con 25 participantes cada unha, onde realizarán distintas actividades como xogos ou deportes, saídas á praia ou ao río, excursións ou iniciativas de difusión do patrimonio cultural.

Os grupos estarán divididos segundo a idade e están abertos tamén á participación daquelas nais que prefiran estar con eles neste período. Nesta primeira quenda, ademais, participan tamén crianzas galegas dunha das familias de acollida, o que permitirá "estreitar lazos".

O principal é que os nenos pasen uns días vivindo "un verán normal", con actividades lúdicas e culturais que, entre outras cousas, lles permitan "conectar coa cultura galega" e "saír da contorna na que están acollidos", explicou Carlota Sánchez-Montaña, así como dar "un respiro ás familias". En cada quenda haberá monitores e persoas tradutoras para facilitar a comunicación.

Unha das mulleres que participan nesta primeira quenda dos campamentos é Inna, nai de tres crianzas coas que vive cunha familia galega "moi amable". Sobre a súa vida en Galicia, Inna destaca a proximidade entre a cultura galega e a ucraína e di que a adaptación "foi boa". Con todo, e aínda que vive pendente das noticias de Ucraína, non fai plans de futuro. "Non sabemos os nosos plans, porque esperamos cada día que sexa o fin da Guerra", destacou.