Por Europa Press / Redacción | Santiago de Compostela | 30/06/2022 | Actualizada ás 15:53
Un estudo do Centre de Recerca Ecològica i Aplicacions Forestals (Creaf), da Universitat de Barcelona (UB) e outras institucións identificou un cambio "sen precedentes" no réxime de incendios en Europa, con veráns e primaveras cun risco de incendio inédito nos últimos anos. Ambas as institucións explicaron que moitas zonas da Europa meridional e o Mediterráneo experimentan "condicións extremas e propicias ao lume", cada vez máis frecuentes polo aumento das ondas de calor e a seca hidrolóxica.
O traballo, publicado en 'Scientific Reports', vincula o aumento do risco de incendio cunhas maiores emisións de CO2 derivadas do lume, medidas en observacións por satélite e observadas tamén na Europa do norte, que posúe importantes reservas de carbono na tundra e os bosques boreais.
"As zonas boscosas e montañosas do sur e centro de Europa son as áreas nas que se detectan os aumentos máis grandes do risco de incendio", apuntou o autor do estudo, Jofre Carnicer, que citou os Pireneos, o macizos ibérico e cantábrico, os Alpes, o Macizo Central francés, os Apeninos, Cárpatos, Balcáns, Cáucaso e o Póntico.
O estudo tamén predí a evolución do risco de incendio en Europa ata 2100 en función de canto aumente a temperatura media: se son dous graos (cunha redución "drástica" de emisións de CO2), haberá 20 días máis de risco de incendio extremo, e se son catro graos de aumento, 40 días máis ao ano.
Os científicos consideran que o risco de incendio "podería pór en perigo as estratexias de descarbonización baseadas nos usos do bosque e o territorio agrícola se non se adoptan estratexias de xestión forestal efectivas", e podería retroalimentar o cambio climático en ciclos progresivos de quecemento, aumento do risco de incendio e de máis emisións de CO2.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.