Por E.P. | SANTIAGO DE COMPOSTELA | 06/07/2022 | Actualizada ás 19:48
As familias dos 21 falecidos do buque galego 'Villa de Pitanxo', afundido na madrugada do 15 de febreiro a 450 quilómetros da costa de Terranova (Canadá), lembran ao ministro de Pesca, Luís Planas, que remitiron ao Goberno central un informe selado polo Colexio de Oficiais da Mariña Mercante Española que expón que é viable localizar e investigar os restos do naufraxio.
En concreto, o ministro, que este mércores visitou un laboratorio de sanidade vexetal en Lugo e a lonxa de Burela, foi entrevistado tamén na Televisión de Galicia (TVG), onde asegurou que aínda "non hai ningunha decisión tomada" respecto de baixar ao fondo do mar a localizar o pecio, algo que non é "unha tarefa sinxela".
Así, aínda que Planas lembrou que é un tema que compete á Dirección Xeral da Mariña Mercante --do Ministerio de Transportes, Mobilidade e Axenda Urbana-- e, aínda que garantiu que se faría "se hai algo que aclarar", tamén argumentou que a investigación "necesita unhas condicións técnicas precisas" das que, dixo, "non" dispoñen.
Tras estas palabras do ministro, a portavoz das familias dos falecidos, María José de Pazo, criticou que se pronunciase a través da TVG, porque esa "non é unha canle" para comunicarse con elas, á vez que censurou que as súas declaracións "non mostran a realidade".
"O único que si é certo e real é que levamos cinco meses, como di o ministro Planas, e non sabemos a profundidade do pecio. E todo o mundo sabe que cun sónar se pode medir de forma sinxela a profundidade. Por tanto, se non se fixo é que non houbo vontade", contestou De Pazo.
"UN INFORME VISADO"
Neste contexto, a portavoz dos familiares lembrou que o Goberno central ten "un informe visado" que "xustifica de forma técnica a total viabilidade da baixada ao pecio". Por iso, reclamou que deixen "de pór escusas" e se lles trate "con respecto e claridade", porque "21 falecidos non son unha pelota para estar de aquí cara alá".
En dito documento, asinado polo capitán Rodrigo Tuero, de Marítima de Consultores Asturleonesa, e selado polo Colexio de Oficiais da Mariña Mercante Española, sitúase aos restos do 'Villa de Pitanxo' nunha profundidade de entre 700 e 1.000 metros, o que faría posible mergullar robots denominados 'ROV', que se empregan comunmente en operacións non só para obter recursos do fondo mariño, senón tamén en investigacións xudiciais para localizar restos humanos.
De feito, o informe detalla que o Estado español ten "en propiedade" varios buques dotados da tecnoloxía necesaria para iso. Ademais, o documento ofrece un plan de procura do pecio do 'Villa de Pitanxo' acoutando unha área de procura cadrada a partir dos últimos movementos do buque que ofrece a 'caixa azul'. Estes datos deducen que o barco apenas percorreu 2,2 millas náuticas (4,1 quilómetros) durante unha hora e 29 minutos.
Así, ao coñecerse tamén a posición recollida coa activación da radiobaliza, pódese estimar a posición do pecio cunha incerteza "moi pequena", dunha milla náutica --sobre 1,8 quilómetros--. Nas conclusións do informe elaborado polo capitán Tuero, exponse que hai "razóns suficientemente sólidas para considerar" que se acometa o traballo de procura, xa que en "distintas ocasións" o Estado español "sufragou inmersións submarinas a profundidades que, en ocasións, triplican as estimadas para o 'Villa de Pitanxo'".
É máis, apunta ao buque 'Sarmiento de Gamboa', do CSIC, como "o máis indicado para a operación", aínda que tamén "outro buque" equipado "con equipos cedidos" podería acometer este labor. E suxire que as tarefas de preparación e mobilización levarían só 10 días.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.