Protesta no Xulgado de Ourense para esixir a readmisión das traballadoras do asilo do Carballiño

Unha representación da Unión comarcal da Confederación Intersindical Galega concentrouse este xoves ante os Xulgados de Ourense para esixir a readmisión das traballadoras do Asilo do Carballiño e o cesamento do "acoso laboral", coincidindo coa celebración do primeiro xuízo polo despedimento de dúas traballadoras.

O secretario comarcal, Anxo Pérez Carballo, lembrou que a central sindical se dirixiu en varias ocasións ao Padroado da Fundación Irmáns Prieto, que dirixe o asilo do Carballiño, no que están representados tamén o Concello e o Bispado, pedindo que "actuasen de urxencia e que garantisen as condicións de traballo aceptadas polas empregadas", en situacións tales como "o horario, as quendas ou a roupa de traballo, así como en materia de prevención de riscos, pero o Padroado ignorou as demandas".

Afearon que, ademais, a partir dese momento "se puxo en marcha unha política de acoso e persecución ás traballadoras máis antigas polo feito de reclamar os seus dereitos". Unha política que para a CIG "se enmarca no cambio de modelo iniciado coa chegada da nova directiva, transformando o vello asilo nunha empresa que só busca o beneficio económico".

Por este motivo a central sindical iniciou unha campaña de mobilización en demanda da readmisión das despedidas e o "cesamento das represións" e ademais presentou denuncias na Inspección de Traballo e a Xunta de Galicia que "certificaron a veracidade" das denuncias feitas polo sindicato.

"Para nós estes despedimentos teñen que ser declarados nulos, xa que claramente responden a unha represalia sindical contra o persoal por denunciar os numerosos incumprimentos de materia laboral e asistencial", expuxo Pérez Carballo, que afirmou que en materias como a prevención de risco "faltan epis ou non se realiza a formación adecuada para as traballadoras".

Así, relatou que Política Social respondeu as denuncias "afirmando que eran certas e que por tanto están a actuar tamén para que se corrixan os graves problemas". Entre eles, o sindicato apunta a que "mesmo hai persoas sen a titulación necesaria administrando medicamentos a persoas residentes e falta persoal de enfermaría nos fins de semana e nos festivos".

A pesar de todo, "a empresa mantén os despedimentos", polo que hoxe concentráronse sindicato e traballadoras ante o xulgado que celebrou o primeiro xuízo para "esixir a readmisión, que se respecten os dereitos do persoal e que se cumpra coa normativa laboral e asistencial".

Así, sostendo pancartas de "non ao acoso" e de "readmisión ás despedidas", o secretario da CIG reiterou que "nin a Igrexa nin o Concello de Carballiño pode mirar para outro lado e dicir que é cousa da xerencia" e piden que "sexan responsables para pór fin dunha vez ao conflito".

Concentración no xulgado de Ourense para exixir a readmisión das traballadoras do Asilo e o cese dos acosos | Fonte: CIG