Queres visitar os espazos máis descoñecidos de Compostela?

A V Semana do Patrimonio Invisible, que terá lugar en Santiago entre o luns 12 e o sábado 17 de setembro, incorpora ás súas visitas o Convento de San Francisco, a capela e o cemiterio da Confraría do Rosario en San Domingos de Bonaval e o Arquivo Histórico Universitario.

Na presentación, que tivo lugar na mañá deste mércores, participou a concelleira de Acción Cultural, Mercedes Rosón e o director de Trivium, César Abella. Así, segundo informou o Concello de Santiago, na actividade participarán un total de 638 persoas que realizarán 50 visitas a 10 lugares, entre as que destacan dúas localizacións secretas.

Ademais, xa que noutras edicións houbo unha alta demanda, visitarán os lugares da Tribuna da Catedral, a Fundación Laboral da Construción, a Facultade de Xeografía e Historia, o Colexio de Fonseca e os mananciais composteláns de Ponte Mantible e Fonte Branca.

As visitas serán de, aproximadamente, unha hora en grupos formados por 15 persoas, salvo no caso dos mananciais, que debido á contorna, serán de 6 persoas. Desta forma, as inscricións abriranse o vindeiro venres 9, ás 17,00 horas na web de Patrimonio Invisible.

XIV SANTIAGO(É) TAPAS

Por outra banda, o prazo de inscrición para o XIV Santiago(é) Tapas, que terá lugar entre o xoves 27 de outubro e o domingo 13 de novembro xa está aberto. Segundo a administración local, o obxectivo deste concurso é fomentar o uso dos produtos autóctonos de tempada e de proximidade. Co cal, as persoas participantes deberán incluír nas súas tapas produtos galegos de calidade "contrastada", como as denominacións de orixe, indicacións xeográficas protexidas, produtos de agricultura ecolóxica ou produtos do mar.

Así, para esta edición, baixo o lema 'Toleamos por (é)Tapas', haberá catro premios. Un á mellor tapa tradicional dotado cun premio de 1.000 euros; mellor tapa creativa cun galardón de 1.000 euros; mellor tapa mariña con viño cunha contía de 500 euros e a tapa mariña con cervexa con 500 euros de premio. Ademais destas gratificaciones haberá outras dúas escollidas polo público, na modalidade creativa e tradicional, ambas dotadas con 700 euros cada unha, así como un premio á mellor tapa sen glute que recibirá unha cesta de produtos por cortesía da Asociación de Celíacos de Galicia.