CIG urxe que a puntuación como profesorado interino aplique no concurso de traslados

CIG-Ensino pediu a "reunión urxente" da mesa docente estatal para aplicar a puntuación como persoal interino no concurso xeral de traslados. Segundo informou o sindicato, en Galicia todo o profesorado que foi interino e participa no Concurso de Traslados ten dereito a que se lle puntúen os méritos obtidos durante o tempo no que era persoal temporal.

Esta solicitude xurdiu por mor da "negativa" do Ministerio a incorporar este dereito na normativa básica estatal, o que ocasionou "problemas" na baremación e adxudicación de prazas cando o profesorado con destino en Galicia concursaba para fóra e viceversa.

Así, lembrou que o Tribunal Supremo, nun recurso de casación promovido pola Xunta de Andalucía, sentou xurisprudencia sobre esta temática, e declarou procedente a valoración dos servizos prestados como funcionario interino e en prácticas dentro do mérito de antigüidade.

Desta forma, o sindicato nacionalista amparouse na sentenza e solicitou "que se faga efectiva nos concursos que se convocan proximamente nos diferentes ámbitos territoriais". "Nesta modificación solicitamos que se puntúe exactamente igual a como se fai en Galicia, incorporando o tempo traballado en centros de especial dificultade ou polo exercicio de cargos e coordinacións", sentenciou.

Rolda de prensa do secretario nacional de CIG-Ensino, Suso Bermello. CIG